Avqustun 14-də Sumqayıt şəhər Ağsaqqallar Şurasının binasında Şuranın idarə heyətinin, Təftiş komissiyasının üzvlərinin, eləcə də ərazi, idarə, müəssisə və təşkilat Ağsaqqallar Şuralarının sədrlərinin iştirakı ilə geniş müşavirə keçirilib.

Sumqayit.tv xəbər verir ki, müşavirədə Şuranın sədri Eldar İsmayılov, Sumqayıt Şəhər İcra Hakimiyyətinin nümayəndəsi Fərman Kazımov, sədr müavinləri, “Sumqayıt” qəzetinin baş redaktoru Sübhan Quliyev, Sumqayıt şəhər Veteranlar Təşkilatının sədri Sovet Şükürov və digər şəxslər iştirak ediblər.

Gündəliyə 22 iyun 2026-cı ildə keçirilən Sumqayıt şəhər Ağsaqqallar Şurasının Konfransından sonra görülən işlərin yekunları, qarşıda duran vəzifələr və fəaliyyət istiqamətləri daxil edilib.

Şuranın sədri Eldar İsmayılov çıxışında ağsaqqalların şəhərin ictimai həyatındakı rolundan danışaraq, onların həyat təcrübəsi, vətəndaş mövqeyi və gənc nəslə nümunə olmaq missiyasının mühüm əhəmiyyət daşıdığını vurğulayıb. Bildirilib ki, qarşıdakı dövrdə ağsaqqalların ictimai fəallığının artırılması, əhali ilə əlaqələrin gücləndirilməsi və gənclərlə işə xüsusi diqqət yetirilməsi əsas istiqamətlərdən olacaq.

Müşavirədə Sumqayıtda son illərdə həyata keçirilən abadlıq-quruculuq və sosial layihələrə də toxunulub. Şəhərin inkişafı ilə bağlı görülən işlərin ictimaiyyətə çatdırılması, sakinlər arasında maarifləndirici fəaliyyətin aparılması və yerli media ilə əməkdaşlığın genişləndirilməsinin vacibliyi qeyd olunub.

Çıxışlarda Ağsaqqallar Şuralarının ərazilərdə mövcud problemləri öyrənməsi, sakinlərin müraciət və təkliflərinə diqqətlə yanaşması, sosial tədbirlərdə fəal iştirak etməsi və milli-mənəvi dəyərlərin qorunmasına töhfə verməsi məsələləri önə çəkilib.

Müzakirələrin yekununda qarşıdakı dövr üçün bir sıra vəzifələr müəyyənləşdirilib. Ağsaqqalların şəhərin ictimai həyatında daha fəal iştirakı, gənclərlə işin gücləndirilməsi, əhali ilə əlaqələrin möhkəmləndirilməsi, milli-mənəvi dəyərlərin qorunması və Sumqayıtda həyata keçirilən inkişaf layihələrinin təbliği istiqamətində fəaliyyətin genişləndirilməsinin vacibliyi vurğulanıb.