Fövqəladə Hallar Nazirliyinin Şimal Regional Mərkəzi Dövlət Yanğın Nəzarəti Xidmətinin Şimal Regional Dövlət Yanğın Nəzarəti İdarəsi ilə birgə mehmanxana və istirahət tipli obyektlərdə yanğın təhlükəsizliyi tələblərinin pozulmasının qarşısını almaq, bu sahədə fəaliyyət göstərən əməkdaşları yanğın təhlükəsizliyi ilə bağlı maarifləndirmək məqsədilə Quba şəhərində yerləşən “Shahdag Guba və Truskavets Medical Sanatoriyası”nda maarifləndirmə tədbiri keçirib.

Sumqayit.tv xəbər verir ki, Tədbirdə yanğın təhlükəsizliyinin təmin olunması ilə bağlı obyekt rəhbərinin daşıdığı məsuliyyət, əməkdaşların yanğın təhlükəsizliyi qaydalarına dair zəruri biliklərə yiyələnməsi və bu qaydalara əməl etmələrinin əhəmiyyəti barədə danışılıb.
Eyni zamanda, binaların, eləcə də binaətrafı ərazilərin təmiz saxlanılmasının vacibliyi diqqətə çatdırılıb, elektrik, havalandırma, isitmə qurğularının istismarı zamanı yanğın təhlükəsizliyi qaydalarına dair tələblər barədə məlumat verilib. Sanatoriyanın əməkdaşları ilə yanğın zamanı zəruri hərəkətlər və obyektdə müalicə alan insanların təhlükəsizliyinin təmin edilməsi, su təchizatı ilə əlaqədar müvafiq normativ sənədlərin tələblərinə ciddi əməl olunması barədə ətraflı söhbət aparılıb.
Həmçinin, əməkdaşlara ilkin yanğınsöndürmə vasitələrindən istifadə qaydaları da əyani şəkildə izah edilib.
Sonra təxliyə planından düzgün istifadə olunmasının, ehtiyat çıxış qapılarının və zirzəmilərin daim istifadəyə yararlı vəziyyətdə saxlanılmasının, ilkin yanğınsöndürmə vasitələri ilə təchizatın vacibliyi diqqətə çatdırılıb və suallar cavablandırılıb.