“ECOserve” proqramı çərçivəsində “Zərərvericilərə qarşı inteqrir mübarizə üsulları: buğda, arpa, yonca və pambıq bitkiləri” mövzusu üzrə təlimçilər üçün təlim təşkil edilib.

Sumqayit.tv xəbər verir ki, təlimin əsas məqsədi zərərvericilərə qarşı mübarizə sahəsində çalışan əlaqədar hökumət və ictimai qurumların nümayəndələri və aqrar məsləhət xidmətçilərini zərərvericilərə qarşı mübarizə üsulları, pestisidlərin təsnifatı ilə tanış etmək, buğda, arpa, pambıq və yonca bitkilərinin xəstəlikləri, zərərvericiləri, alaq otları və onlara qarşı mübarizə metodları haqqında məlumatlandırmaq olub. Tədbirdə Kənd Təsərrüfatı Nazirliyinin əməkdaşları, Elmi-tədqiqat institutlarının, Azərbaycan Dövlət Aqrar Universitetinin, Aqrar Xidmətlər Agentliyinin, Qida Təhlükəsizliyi Agentliyinin və digər müvafiq qurumların 26 nəfər mütəxəssisi iştirak edib. Təlim iştirakçılarının əldə etdiyi bilik və məlumatların layihənin növbəti mərhələsində fermerlərə çatdırılması nəzərdə tutulub.
Təlimi uğurla başa vuran iştirakçılara sertifikat təqdim edilib.
Qeyd edək ki, Almaniya Beynəlxalq Əməkdaşlıq Cəmiyyəti (GİZ)  “Cənubi Qafqazda kəndlərin davamlı inkişafı üçün təbii sərvətlərin idarə edilməsi və ekosistem xidmətlərinin qorunması” (“ECOserve”) proqramı Azərbaycan Respublikası Kənd Təsərrüfatı Nazirliyi ilə əməkdaşlıq çərçivəsində icra olunur. “ECOserve” regional proqramı Almaniya Federal Hökumətinin Cənubi Qafqazda prioritet sahələrindən biri olan təbii ehtiyatların qorunması və davamlı istifadəsinə yönəlib. Proqramın əhatə etdiyi sahələrə ekoloji siyasət dialoqu, təhsil və təlim, maarifləndirmə və pilot layihələrin icrası daxildir. Azərbaycanda “ECOserve” proqramı kənd təsərrüfatı torpaqlarının davamlı istifadəsi sistemlərinin tətbiqinə yönəlib.