2020-ci ildə keçirilən buraxılış və qəbul imtahanlarında 213 nəzarətçi qayda pozuntusuna yol verib.

 

Sumqayit.tv xəbər verir ki, bu barədə məlumat Dövlət İmtahan Mərkəzinin "Abituriyent" jurnalının 12-ci nəşrində əks olunub.

 

Qeyd edilib ki, ciddi qayda pozuntusuna yol verənlərin sayı isə 69 nəfər olub.

 

"Bu göstəricilər müvafiq olaraq qəbul imtahanları üzrə 156 və 57, buraxılış imtahanları üzrə 57 və 12-dir. Həm buraxılış, həm də ali təhsil müəssisələrinə qəbul imtahanlarının keçirildiyi bəzi rayonlarda qayda pozuntusu hallarına daha çox şərait yaradılıb: Ağstafa, Qazax, Şəmkir, Ağcabədi, Cəlilabad, Şirvan, Salyan, Masallı, Kürdəmir.

 

Ağstafa, Qazax, Şəmkir, Cəlilabad, Masallı və Kürdəmir rayonları 2020-ci ildə də qayda pozuntuları daha çox müşahidə olunan rayonlar arasında idi".

 

Həmçinin bildirilib ki, yalnız buraxılış imtahanlarının keçirildiyi rayonlar götürüldükdə qayda pozuntusu hallarına ən çox bu Şərur, Qobustan, Yevlax, Tərtər, İmişli, Beyləqan, Neftçala və Astara rayonlarında rast gəlinib.

 

"2015-ci ildən bəri ümumi statistikaya baxdıqda buraxılış imtahanlarında Qazax, Şərur, Şəmkir və Beyləqan nəzarətçilərinin daha çox qayda pozuntularına yol verdiklərini demək olar. Cari ildə qəbul imtahanlarının II mərhələsində nəzarətçilərin 2,4%-i, buraxılış imtahanlarında 0,3%-i qayda pozuntularına yol verib. Bu azalma buraxılış imtahanlarında daha kəskin nəzərə çarpır. Köçürmə hallarının azalmasında çoxvariantlılığın tətbiqi və iştirakçıların imtahan zalında tək-tək əyləşdirilməsi faktorlarının da böyük təsiri var".