Təhsil müəssisələrinə müəllimlərin işə qəbulu üzrə müsabiqənin əsas mərhələsinə start verilir. Bu mərhələ 14-22 iyul tarixlərini əhatə edəcək. İmtahanlar 7 gün ərzində 15 mərkəzdə keçiriləcək, hər bina sərinləşdirici avadanlıq və vasitələrlə təmin olunacaq.

 

Sumqayit.tv xəbər verir ki, builki MİQ imtahanlarında bir sıra yeniliklərin tətbiqi nəzərdə tutulub.

 

Belə ki, cari tədris ili üzrə müəllimlərin işə qəbulu müsabiqəsinin regionlarda təşkili planlaşdırılır. 56 min şəxsin müəllimlərin işə qəbulu müsabiqəsində iştirakı təmin olunacaq. MİQ-də iştirak üçün müraciət edən 4000 nəfərə isə imtina cavabı göndərilib.

 

İmtahan müddətini hər fənn üzrə 90 dəqiqədən 120 dəqiqəyədək artırılıb.

 

Müəllimlərin işə qəbulu imtahanları başa çatdıqdan sonra ayrı-ayrı fənlər üzrə nəticələrdən asılı olaraq keçid balları müəyyənləşdiriləcək.

 

Müəllimlərin işə qəbulu üzrə test imtahanında səhv cavablandırılmış suallar düzgün cavabların dörddə bir hissəsinə təsir edəcək. 

 

"Namizəd ixtisas sualına səhv cavab verirsə, bu, həmin ixtisasdan olan sualın və ya ümumilikdə düz cavablandırılan sualın 0.5 balını aparacaq. Metodikadan səhv cavablandırılan sual isə nəticəni 0.25 bal azaldacaq", -  Təhsil Nazirliyinin İnsan Resursları şöbəsinin müdiri Eşqi Bağırov bildirib.

 

Vakant yerlərin müəyyən edilməsi ilə yerli idarəetmə orqanları məşğul olacaq. Ümumitəhsil məktəblərində 3 ildən az müddətdə çalışan namizədlər MİQ müsabiqəsində yerdəyişmə məqsədilə iştirak edə bilməyəcəklər.

 

İmtahanda iştirak edəcək şəxslərdən COVID pasportu tələb olunmayacaq, tibbi maskadan istifadə isə məcburi deyil.

Bundan əlavə, qeyd edək ki, namizədlər şəxsi səhifəsində göstərilən son qeydiyyat saatından sonra imtahan zalına buraxılmayacaq.