Kişilər klubu yeni layihəyə start verib
Etika qaydaları dayanacaqlara, metrolara, kafelərə, insanların çox olduğu yerlərə vurulacaq. Buklet şəklində hazırlanıb paylanacaq.
1-ci buklet (yalnız kişilər üçün)
• İctimai nəqliyyatda xanımlara toxunmadığınız üçün sizə minnətdarıq!
• Yerə tüpürmədiyiniz üçün başınız uca olsun!
• Çəkdiyiniz siqaretin kötüyünü yerə atmadığınız üçün qəlbiniz nura boyansın!
• İctimai yerlərdə qasığınızı qaşımadığınız üçün ruziniz bol olsun!
• İctimai yerlərdə nalayiq söz işlətmədiyiniz üçün bay olasınız!
• Avtobus dayanacaqlarında, parklarda insanların, xüsusən də xanmların və uşaqların olduğu məkanda siqaret çəkmədiyiniz üçün yüz yaşayın!
• Fərqli geyimi və saç düzümü olan insanlara lağ etmədiyiniz üçün xoşbəxt olun!
• Metro vaqonunda əyləşərkən ayaqlarınızı aralamadığınız üçün bəxtiniz üzünüzə gülsün!
• İctimai nəqliyyatda xanımlara yer verib, sonra da başları üstündə dayanıb, onları süzmədiyiniz üçün Tanrı sizə yar olsun!
2-ci buklet (hamı üçün)
Dəyərli dost!
• Yaşından asılı olmayaraq hər kəsə, xüsusən də tanımadığınız adama “siz” deyə müraciət etdiyiniz üçün yüz yaşayın!
• Növbəyə durmaq tələb olunan yerlərdə növbə mədəniyyətinə əməl etdiyiniz üçün sizə minnətdarıq!
• Növbələrdə qarşınızdakı adamla aranızda məsafə saxladığınız üçün sizə təşəkkür edirik!
• Ayaqyoluna girəndə və çıxanda əlinizi sabunla yuduğunuz üçün var olun!
• Öskürəndə, asqıranda üzünüzü yana çevirib, əlinizlə ağzını örtdüyünüz üçün çox sağ olun!
• Nəfəsinizin daim təravətli olmasını təmin etdiyiniz üçün qəlbinizin nuru tükənməsin!
• Özünəxidmət kafelərində yemək yedikdən sonra süfrənizi yığışdırdığınız üçün ömrünüz uzun olsun!
• Restoranda, kafede, çayxanada süfrəçini çağıranda qışqırmadığınız üçün Tanrının kölgəsi üstünüzdək əskik olmasın!
• Bədəninizin, paltarınızın təmizliyinə diqqət etdiyiniz üçün, sizdən tər qoxusu gəlmədiyinə görə qaraçuxanız daim oyaq olsun!
• Küçələrdəki sahibsiz heyvanlara zərər vermədiyiniz üçün Tanrı sizə yar olsun!
• Blokda, liftdə, iş yerində qarşılaşdığınız insanlara təbəssümlə salam verdiyiniz üçün min budaq olun!
• Avtobusa, metroya minərkən xanımlara, ahıllara, uşaqlara, əlilliyi olan şəxslərə öncəlik verdiyiniz üçün bay olun!
• İctimai nəqliyyatda gözünüzü yanınızdakı adamın telefonunun ekranına zilləmədiyiniz üçün arzularınız çin olsun!
• İctimai nəqliyyatda, cəmiyyət arasında telefonla yüksək səslə danışmadığınız üçün başınız uca olsun!
• Bankomatlarda növbə gözləyərkən özünüzdən əvvəlki adamın bank əməliyyatlarına baxmadığınız üçün ömür boyu alnıaçıq yaşayasınız!
• Yolda avtomobil hərəkət edib-etməməsindən asılı olmayaraq, yolu işıqforun yalnız yaşıl işığında keçdiyinizə görə qarşınızdan axan sular duru olsun!
• Zəng etdiyiniz adam telefona cavab vermirsə, iki dəfədən çox zəng etmədiyiniz üçün işıqlı günləriniz bol olsun!
29-08-2022, 10:56
176
