“Rusiyanın başlatdığı savaşda Ukraynanın məğlubiyyəti Üçüncü Dünya Müharibəsinin başlamasına səbəb ola bilər. Ona görə də Qərb Kiyevə təcavüzü dəf etmək üçün lazım olan silahları verməlidir”.
Sumqayit.tv xəbər verir ki, bunu Polşa Baş naziri Mateuş Moravetski deyib.
“Otuz illik liberal sülh illüziyaya çevrildi. Qərbi Avropa “rus ayısı”nın çox asan əhliləşdirilə biləcəyinə inanırdı”, - baş nazir söyləyib.
Onun iddiasına görə, Rusiya müharibədə qalib gəlsə, dünya bunun ciddi nəticələrini gözləyə bilər.
“Ukraynanın məğlubiyyəti Üçüncü Dünya Müharibəsinin müqəddiməsinə çevrilə bilər, ona görə də Kiyevə dəstəyin qarşısını almaq və onu qeyri-müəyyən müddətə təxirə salmaq üçün heç bir əsas yoxdur”, - Moravetski vurğulayıb.
Polşa baş naziri Almaniya hökumətini qətiyyət göstərməyə və Ukraynanı bütün növ silahlarla təmin etməyə çağırıb. Eyni zamanda, Moravetski Qərbi Avropanı Rusiya ilə münasibətləri bərpa etmək cəhdlərindən çəkinməyə dəvət edib.
“Rusiya ilə anlaşmaq şeytanla sövdələşməyə bənzəyir. Bu, Rusiya qazından asılı olan ölkələrin boynuna yük oldu. Qərb üçün sadəcə uğursuz biznes maraqları məsələsi olan şey Ukrayna və Polşa kimi ölkələr üçün ölüm-dirim məsələsinə çevrilib”, - baş nazir qeyd edib.