“Əminəm ki, Ermənistan hakimiyyəti Qarabağ məsələsini tarix kitablarından çıxaracaq, onlar hər şeyi xalqa unutdurmağa çalışacaqlar”.
Sumqayit.tv xəbər verir ki, bunu Ermənistanın keçmiş xarici işlər naziri Vardan Osknyan deyib.
Oskanyan Qarabağ səhifəsinin bağlanacağını və bundan narahat olduğunu bildirib:
“Hakimiyyət nümayəndələrinin verdiyi bəyanatlar, atdıqları addımlardan görünür ki, onlar Qarabağ məsələsini tamamilə bağlamağa, unutdurmağa çalışırlar. Hazırda dünyanın diqqəti Ukraynadan sonra İsrail və Fələstin məsələsinə yönəldiyi üçün Qarabağ yaddan çıxır. Bu səhifə belə getsə bütövlükdə bağlanacaq. Paşinyan böyük səhv edir, o özü başımıza müharibə bəlasını gətirmişdi. 9 noyabr sənədi bizim üçün pis olsa da, müəyyən ümidlər var idi. Lakin Paşinyan həmin sənəddə nəzərdə tutulmayan əraziləri də Azərbaycana qaytarmaq qərarına gəldi. Nə qədər etməməsini desək də, bizi dinləmədi. O anlaşılmaz şəkildə Azərbaycanın ərazi bütövlüyünü də tanıdı”.
“Vladimir Putin bu günlərdə keçirdiyi mətbuat konfransında Paşinyanı siyasi cəhətdən tamamilə məhv etdi. Putin açıq-aydın deməsə də, bizi başa saldı ki, bütün itkilərimizin səbəbi Paşinyanın addımlarıdır. O həmin səhifəni tamamilə bağladı. İnanın ki, bu sadəcə Rusiyanın deyil, həm də ABŞ, Fransa, Avropa İttifaqı liderlərinin də fikridir, sadəcə Putin kimi səsli şəkildə açıqlamırlar. Onlar deyirlər ki, heç nə edə bilməzlər, çünkü Paşinyan Azərbaycanın ərazi bütövlüyünü tanıyıb”, – Oskanyan bildirib.// Globalinfo.az