Gürcüstan prezidentlərin əfv işlərinə görə “mühakimə olunduğu” yeganə ölkədir.
Sumqayit.tv xarici agentliklərə istinadən xəbər verir ki, bu barədə Gürcüstanın keçmiş prezidenti Mixail Saakaşvili yazıb.
Üçüncü prezident bunun “dövlət üçün tamamilə qəbuledilməz və dağıdıcı” olduğunu bildirib.
Saakaşvili Gürcüstanın baş prokuroru İrakli Şotadzenin bir sıra şəxslərin əfv olunması ilə bağlı prezident Salome Zurabişviliyə qarşı cinayət işinin açıla biləcəyi ilə bağlı bəyanatına münasibət bildirib.
“Oliqarx (Bidzina İvanişvilini nəzərdə tutur-red.) dövlət qurumlarından qalan hər şeyi məhv edir. Biz bunu mütləq dayandıra bilərik. Ümid edək ki, Salome Zurabişvili özü də vəziyyətin ciddiliyini anlayır və həm Rusiyanın agenti Partsxaladzenin vətəndaşlığı məsələsində, həm də müxtəlif vəzifələrə namizədlərin təsdiqlənməməsi istiqamətində təsirli addımlar atacaq” - deyə Saakaşvili yazır.
Xatırladaq ki, 2019-cu ildə Gürcüstan prezidenti Mariamoba bayramı münasibətilə 34 nəfəri əfv edib. Əfv olunanların siyahısı açıqlanmayıb.
Gürcüstan mediasının yazdığına görə, əfv olunanlar arasında polis əməkdaşı Taraş Mukbanianini öldürməkdə təqsirli bilinən Ramaz Devadze də var.
Siyahıda prokurorluğun 12 ildir axtardığı, 18 yaşlı David Otxmezurinin qətlində təqsirli bilinən Aslan Bejanidzenin də adına rast gəlinir.//Musavat.com