Gürcüstanın Dövlət Təhlükəsizliyi Xidməti terror aktının hazırlanması və hökuməti devirmək üçün sui-qəsd, habelə hakim “Gürcü Arzusu-Demokratik Gürcüstan” partiyasının qurucusu Bidzina İvanişvilinin öldürülməsi faktlarını araşdırır.
Sumqayit.tv publika.az-a istinadən xəbər verir ki, bu barədə Dövlət Təhlükəsizliyi Xidmətinin məlumatında deyilir.
Bundan əvvəl “İmedi” telekanalı hakim “Gürcü Arzusu – Demokratik Gürcüstan” partiyasının təsisçisi və fəxri sədri Bidzina İvanişviliyə və partiyanın digər yüksək vəzifəli şəxslərinə qarşı terror aktının hazırlanması barədə məlumat yayıb. Bildirilib ki, məhkəmə bir neçə gündür ki, bu iş üzrə insanları dindirir. Onların əksəriyyəti Ukraynada döyüşmüş muzdlulardır.
Dövlət Təhlükəsizliyi Xidməti Gürcüstanın keçmiş məmurları və Ukraynada yerləşən təhlükəsizlik qüvvələrinin nümayəndələri tərəfindən maliyyələşdirilən cinayətlərin hazırlanması faktlarını araşdırır.
“Bu cinayət əməllərinin məqsədi dövlət hakimiyyətini devirməkdir”, - departamentin bəyanatında deyilir.
Hazırda fəal istintaq və əməliyyat-axtarış tədbirləri davam etdirilir, bir neçə nəfər şahid qismində dindirilib.