Bu sözləri Musavat.com-a açıqlamasında politoloq Elxan Şahinoğlu deyib.

Politoloq qeyd edib ki, Pekinin bu qərarı Avropa ölkələri üçün gözlənilməz olub:

"ABŞ Prezidenti Donald Tramp Avropa İttifaqından Çinlə iqtisadi münasibətlərə yenidən baxmağı tələb edir, O Çin məhsullarına gömrük rüsumlarının artırılmasını tələb edirdi. Brüssel Ağ Ev sahibinin tələbini yerinə yetirməyi tələsmirdi. Pekinin nadir torpaq elementlərinin ixracına qoyulan məhdudiyyətlər qoymasını Avropa İttifaqına arxadan zərbə kimi qiymətləndirmək olar. Bu səbəbdən Avropa Komissiyasının Prezidenti Pekini nadir torpaq elementlərinin ixracına qoyduğu  məhdudiyyətləri sərt tənqid edib.

Problem ondadır ki, Avropa İttifaqı ölkələri onlara istehsalda lazım olan nadir torpaq elementlərinin əksər hissəsini məhz Çindən idxal edirlər. Belə vəziyyətdə Avropa dövlətləri alternativ mənbələr tapmaq məcburiyyətindədirlər. Bu sırada Kanada, Çili, Avstraliya, Qazaxıstan, Özbəkistan və Ukraynanın adı çəkilir. Brüssel bu ölkələrdən nadir torpaq elementlərini idxal etməyə çalışacaq".

Politoloqun fikrincə, Avropa İttifaqı tələsməlidir:

"Çünki, Çindən ixrac edilən nadir torpaq elementləri Avropada avtomobil, müdafiə, aviasiya, süni intellekt çipləri və məlumat mərkəzləri kimi sənaye sahələrində istifadə edilirdi. Məsələn, Avropa nadir torpaq maqnitlərinin 90 faizdən çoxunu Çindən idxal edirdi. Bu sahələrdə istehsalın dayandırılmaması üçün Çin təcili şəkildə başqa ölkələrlə əvəz edilməlidir.

Buna baxmayaraq, Fon der Lyayen məsələni həll etmək üçün Pekinlə danışıqların tərəfdarıdır. Görünür, Brüssel ümid edir ki, Pekin nadir torpaq elementləriylə bağlı qərarını dəyişə bilər. Halbuki, Pekin geri addıma hazırlaşmır. Bunun nəticəsidir ki, Fransa Prezidenti Emmanuel Makron Avropa liderlərinə Çinə qarşı sərt qərarlar qəbul etməyə çağırıb. Paris hesab edir ki, Çin ticarətdə aqressiv siyasətə üstünlük verməyə başlayıb. Bununla da ABŞ-la Çin arasında ticarət müharibəsinə Avropa İttifaqı da qoşulmuş olacaq".