İranın Türkiyə istiqamətinə raket buraxması NATO-nun sərhəd təhlükəsizliyi və operativ reaksiyasını sınaqdan keçirmək cəhdi kimi qiymətləndirilir. 

Bu barədə Bloomberg məlumat yayıb.
 

Agentliyin yazdığına görə, Şərqi Anadoludakı Kürecik bazasında yerləşən ABŞ-ın AN/TPY-2 erkən xəbərdarlıq radarı İrana ən yaxın əsas izləmə sistemlərindən biridir və bölgədə raket buraxılışlarının izlənməsində mühüm rol oynayır.

Bloomberg-in Türkiyə hökumətinin mövqeyinə yaxın mənbələrə istinadən yaydığı məlumata görə, son iki həftədə NATO tərəfindən ələ keçirilən üç İran raketindən azı birinin ehtimal olunan əsas hədəfi məhz Kürecikdəki bu obyekt olub.

Reuters də daha əvvəl yazıb ki, Türkiyə son günlərdə İran tərəfindən atılan üç ballistik raketin NATO hava hücumundan müdafiə sistemləri vasitəsilə zərərsizləşdirildiyini açıqlayıb.

Ankara İranın birbaşa Türkiyəni müharibəyə çəkmək istədiyini düşünmədiyini bildirsə də, bu cür tək raket buraxılışlarının NATO-nun cavab imkanlarını yoxlamağa yönələ biləcəyi ehtimalı səsləndirilir.

Artan risk fonunda NATO Türkiyənin cənub-şərqində hava müdafiəsini gücləndirib. Reuters-in məlumatına görə, Malatya vilayətinə ABŞ-ın Patriot sistemi yerləşdirilib və bu addım məhz Kürecik radar bazasının və Türkiyə hava məkanının daha yaxşı qorunmasına hesablanıb.

Türkiyə isə hələlik mövqeyini dəyişməyib. Associated Press-ə danışan xarici işlər naziri Hakan Fidan bildirib ki, Ankara münaqişəyə cəlb olunmaq istəmir və neytral qalmağa çalışır, baxmayaraq ki, İran raketləri artıq Türkiyə hava məkanında ələ keçirilib. /Bizim.Media