İranın xarici işlər naziri Abbas Əraqçi diplomatik danışıqların yekunları ilə bağlı açıqlama verərək, tərəflər arasında mühüm irəliləyişlərin əldə olunduğunu bildirib.

Sumqayit.tv xəbər verir ki, nazir Pakistan və Qətərin vasitəçilik səylərinin danışıqlar prosesində mühüm rol oynadığını vurğulayıb. Onun sözlərinə görə, Livanda hərbi əməliyyatların dayandırılması istiqamətində tərəflər arasında ciddi yaxınlaşma müşahidə olunur.

Əraqçi qeyd edib ki, Livan cəbhəsində mümkün atəşkəs əldə olunmuş razılaşmaların praktikada necə işləyəcəyini göstərəcək əsas mərhələ hesab olunur.

Nazir həmçinin bildirib ki, əldə olunan razılaşmalar yalnız təhlükəsizlik məsələlərini deyil, iqtisadi sahəni də əhatə edir. Sənədə əsasən, İranın neft və neft-kimya məhsullarının ixracına tətbiq olunan bəzi məhdudiyyətlərin müvəqqəti dayandırılması, eləcə də ölkəyə qarşı tətbiq edilən dəniz blokadasının aradan qaldırılması nəzərdə tutulur.

Bununla yanaşı, İranın xarici banklarda saxlanılan dondurulmuş vəsaitlərinin bir hissəsinin sərbəst buraxılması planlaşdırılır. Rəsmi Tehran həmin maliyyə resurslarının ölkənin iqtisadiyyatının bərpasına və inkişaf layihələrinin maliyyələşdirilməsinə yönəldiləcəyini açıqlayıb.

Əraqçi vurğulayıb ki, razılaşmaların tam icrası regionda sabitliyin möhkəmlənməsinə və iqtisadi əməkdaşlığın genişlənməsinə töhfə verə bilər.

22-06-2026, 10:21 76