Tramp Ankoric razılaşmalarından imtina edə bilər
ABŞ Prezidenti Donald Tramp Rusiya Prezidenti Vladimir Putinlə Alyaskanın Ankoric şəhərində keçirilən ikitərəfli görüş zamanı əldə olunan bəzi razılaşmalardan imtina edə bilər.
Sumqayit.tv xəbər verir ki, bu barədə "Axios" portalı öz mənbələrinə istinadən məlumat yayıb.
Nəşrin məlumatına görə, Tramp bu barədə Fransada keçirilən G7 (Böyük Yeddilik) sammiti zamanı digər ölkə liderləri ilə görüşündə danışıb. Sammitdə iştirak edən iki yüksəkvəzifəli mənbənin bildirdiyinə əsasən, ABŞ Prezidenti Putinlə bağlı məyusluğunu ifadə edib və Ankoricdə əldə olunmuş razılaşmaların bir hissəsindən geri çəkilə biləcəyinə işarə vurub.
Bununla belə, məqalədə qeyd olunur ki, G7 ölkələrinin liderləri Trampın bu istiqamətdə həqiqətən konkret addımlar atacağına inanmırlar.
Xatırladaq ki, ABŞ dövlət katibi Marko Rubio daha əvvəl Ankoric görüşündə Rusiya və ABŞ prezidentləri arasında Ukraynadakı münaqişənin nizamlanması ilə bağlı yekun razılaşmanın əldə olunmadığını açıqlamışdı.
Qeyd edək ki, 2025-ci il avqustun 15-də Alyaskanın Ankoric şəhəri yaxınlığındakı hərbi bazada Rusiya Prezidenti Vladimir Putinlə ABŞ Prezidenti Donald Tramp arasında görüş keçirilib. Görüşün yekunlarına dair mətbuata açıqlama verən Putin Ukraynadakı münaqişənin nizamlanmasının danışıqların əsas mövzusu olduğunu bildirib, Vaşinqtonla münasibətlərdə yeni səhifənin açılmasına və əməkdaşlığın bərpasına çağırış edib. O, həmçinin Donald Trampı Moskvaya dəvət edib.
Donald Tramp isə öz növbəsində danışıqlarda müəyyən irəliləyiş əldə olunduğunu, lakin tərəflərin bütün məsələlər üzrə razılığa gələ bilmədiyini bildirib.
27-06-2026, 23:27
71
