Fövqəladə Hallar Nazirliyinin Akademiyasının rəisi general-mayor Baba Salayevin rəhbərlik etdiyi Akademiyanın nümayəndə heyəti 7-11 fevral 2022-ci il tarixlərində Ukraynanın Xarkov şəhərində işgüzar səfərdə olub.

FHN Akademiyasının rəisi general-mayor Baba Salayev səfər zamanı Ukrayna Milli Mülki Müdafiə Universitetinin rektoru general-leytenant Vladimir Sadkovoy ilə görüş keçirib. Görüşdə hər iki təhsil ocağı arasında elm və təhsil sahələrində əməkdaşlığın inkişaf etdirilməsinin əhəmiyyəti vurğulanıb, birgə tədqiqat layihələrinin həyata keçirilməsinə dair fikir mübadiləsi aparılıb.
Səfər çərçivəsində general-mayor Baba Salayev Azərbaycan Respublikasının Ukraynanın Xarkov şəhərində fəxri konsulu Əfqan Salmanov ilə görüşüb, fəxri qonaqlar üçün nəzərdə tutulan xatirə kitabına ürək sözlərini yazaraq fəxri konsulluğun əməkdaşlarına işlərində uğurlar arzulayıb.