İlk dəfə Afrikada aşkarlanan və dünyada sürətlə yayılan “Meymun çiçəyi” xəstəliyi Böyük Britaniya, ABŞ, Kanada, Avstraliya, İsrail, İsveçrə və Avstriya da daxil olmaqla 15 ölkəyə yayılıb.

 

Sumqayit.tv xəbər verir ki, dünyada indiyədək 80 yoluxma halının qeydə alındığı bildirilsə də, xəstəliyin daha çox rast gəlindiyi Britaniyanın səhiyyə rəsmiləri yoluxmaların kəskin artacağını proqnozlaşdırırlar.

 

Nadir xəstəliyə yoluxmuş şəxslərlə yaxın təmasda olanlar 21 gün ərzində özlərini təcrid etməli, işdən uzaq durmalıdırlar.

 

İmmuniteti zəif olan şəxslər, hamilə qadınlar və 12 yaşdan kiçik uşaqlar belə insanlarla təmasdan çəkinməlidir.

Virusun aşkar olunduğu Belçika xəstəliyin yayılmasının qarşısını almaq üçün üç həftəlik karantin tətbiq edən ilk ölkə olub.

 

Rəsmi adı “Monkeypox” olan virus asanlıqla yayılmır və yoluxmuş şəxslərdə qızdırma, dəri şişməsi və blisterlər kimi müalicə tələb etməyən yüngül simptomlara səbəb olur. Bununla belə, virus immun sistemi zəif olan insanlarda, hamilə qadınlarda və azyaşlı uşaqlarda daha ciddi xəstəliklərə səbəb ola bilər. Britaniyada aşkarlanan xəstələrdən birinin reanimasiyada müalicə olunduğu təsdiqlənib. Bu fakt xəstəliyin ağır və təhlükəli olmasından xəbər verir.

 

Qeyd edək ki, Böyük Britaniyada 2018-ci ildən 2021-ci ilə qədər 7 “meymun çiçəyi”nə yoluxma faktı müəyyən edilib. Bu halların Nigeriya ilə əlaqəli olduğu ehtimal olunub.

 

Mütəxəssislər xəstəliyin cinsi yolla yayıla biləcəyini və homoseksual gənclər tərəfindən daha çox insana ötürülə biləcəyi barədə xəbərdarlıq ediblər.

 

Qeyd edək ki, “meymun çiçəyi” virusu 1980-ci ildə Avropada rəsmi olaraq aradan qaldırılmış çiçək xəstəliyi irsinə aiddir. Bunu simptomları çiçək xəstəliyinə bənzəyir.

 

“Meymun çiçəyi” virusuna yoluxmuş şəxslərdə çiçək xəstəliyində olduğu kimi qızdırma, baş ağrısı, əzələ ağrıları, üşümə və qızartı, dəridə qabarcıq kimi şikayətlər meydana çıxır.

 

Mütəxəssislərin fikrincə, “meymun çiçəyi” virusu ona yoluxanların 30 faizini öldürən çiçək xəstəliyindən qat-qat az təhlükəlidir. Meymun çiçəyi virusuna yoluxanlarda xəstəliklər bir neçə həftə ərzində öz-özünə yox olur.