Vətən müharibəsində qazanılan tarixi Zəfər nəticəsində imzalanmış 10 noyabr üçtərəfli bəyanatı ölkəmizin ərazi bütövlüyünün bərpası istiqamətində mühüm mərhələ oldu. Bu sənədin icrası çərçivəsində 2020-ci il noyabrın 25-də Kəlbəcər rayonu heç bir hərbi toqquşma baş vermədən, atəşkəs pozulmadan və qan tökülmədən Azərbaycana qaytarıldı. Şübhəsiz ki, bu hadisə Azərbaycan Prezidenti, Müzəffər Ali Baş Komandan İlham Əliyevin siyasi, diplomatik və hərbi sahələrdə həyata keçirdiyi ardıcıl və düşünülmüş fəaliyyətin bariz nəticəsi idi.

Sumqayit.tv xıbər verir ki, bu sözləri Milli Məclisin deputatı Səbinə Salmanova deyib.

Onun sözlərinə görə, Azərbaycan Ordusunun gücü Ermənistanı ərazilərimizi tərk etməyə vadar etdi: “1993-cü ildə işğaldan dərhal sonra Ermənistan BMT və ATƏT-in prinsiplərinə zidd olaraq Kəlbəcərdə qeyri-qanuni məskunlaşdırma siyasəti həyata keçirməyə başlamışdı. Onlar hesab edirdilər ki, Kəlbəcəri heç zaman tərk etməyəcəklər. Azərbaycan Kəlbəcəri işğaldan azad etməklə eyni zamanda BMT Təhlükəsizlik Şurasının 27 ildən çoxdur kağız üzərində qalan 822 saylı qətnaməsini icra etmiş oldu və beynəlxalq hüququn bərqərar olmasına nail oldu”.

Deputat bildirib ki, Kəlbəcər Azərbaycanın ən böyük ərazisi olan rayonudur: “Kəlbəcər həm də strateji və çətin relyefə malik olan bir rayondur. Orada yüksək dağlar, dərin enişlər, yoxuşlar, çaylar var. Bu 27 il ərzində düşmən də boş dayanmayıb və möhkəm istehkamlar qurmuşdu. Onlar 27 il işğalda saxladıqları rayonu tərk edərkən də evləri, binaları, tikililəri talan edib, yandırıb, ağacları qırıb, ekoloji terrora əl atdılar. Bundan başqa, onlar Kəlbəcəri tərk etməzdən əvvəl rayonunun müxtəlif ərazilərində, yol keçidlərində piyada və tank əleyhinə minalar basdırmışdılar. Bütün bunlar erməni xislətinin təzahürüdür".

S.Salmanova qeyd edib ki, hazırda işğaldan azad edilmiş digər rayonlarda olduğu kimi, Kəlbəcərdə də böyük bərpa-quruculuq işləri aparılır: “Düşmən orada da daşı daş üstünə qoymamışdı. Azərbaycan dövləti öz vəsaiti hesabına hazırda Kəlbəcəri yenidən qurur, kəndlər, qəsəbələr salır. Əminliklə demək olar ki, yaxın gələcəkdə Kəlbəcər də digər azad edilmiş torpaqlarımız kimi inkişaf etmiş, müasir və dünyanın ən gözəl guşələrindən birinə çevriləcək”.

25-11-2025, 15:14 146