Azərbaycanda ekoloji vəziyyət və hava çirkliliyi ilə bağlı müzakirələr davam edir. Mütəxəssislərin fikrincə, ölkənin ən çox çirklənməyə məruz qalan əraziləri sırasında Sumqayıt da yer alır.
Ekoloq Sadiq Həsənovun sözlərinə görə, Bakı-Abşeron yarımadası uzun illər davam edən sənaye fəaliyyəti, neft-qaz hasilatı və urbanizasiya səbəbindən ekoloji baxımdan ən problemli bölgələrdən biridir. O bildirib ki, bu ərazilərə Sumqayıt şəhəri də daxildir.
Mütəxəssis qeyd edib ki, sənaye müəssisələrinin fəaliyyəti, nəqliyyat vasitələrinin sayının artması və digər antropogen amillər bölgədə hava, torpaq və su ehtiyatlarına təsir göstərib.
Ekoloqun fikrincə, son illər ekoloji vəziyyətin yaxşılaşdırılması istiqamətində müəyyən tədbirlər görülsə də, Bakı-Abşeron bölgəsində, o cümlədən Sumqayıtda ekoloji problemlər hələ də aktuallığını qoruyur.
Qeyd edək ki, Sumqayıt uzun illər sənaye şəhəri kimi formalaşıb və ekoloji vəziyyətin yaxşılaşdırılması məqsədilə müxtəlif dövlət proqramları həyata keçirilir.

Mənbə: Demokrat.az