Son günlər Abşeron yarımadasında, xüsusilə dənizkənarı ərazilərdə çəyirtkələrin kütləvi şəkildə müşahidə olunması ilə bağlı Kənd Təsərrüfatı Nazirliyi yanında Aqrar Xidmətlər Agentliyinə çoxsaylı məlumatlar daxil olub.

Sumqayit.tv xəbər verir ki, nazirliyin yaydığı məlumata əsasən, müraciətlərlə əlaqədar Aqrar Xidmətlər Agentliyinin Bitki Mühafizəsi və Fumiqasiya Mərkəzinin əməkdaşları dərhal ərazilərə cəlb olunaraq müşahidə və qiymətləndirmə işlərinə başlayıblar.

Mütəxəssislərin rəyinə görə, çəyirtkələrin kütləvi yayılması son dövrlərdə müşahidə olunan kəskin iqlim dəyişiklikləri ilə əlaqədardır. Bildirilir ki, qlobal və regional iqlim şəraitinin dəyişməsi nəticəsində müxtəlif canlı növləri, o cümlədən çəyirtkələr yeni coğrafi ərazilərə doğru miqrasiya edirlər.

Hazırda zərərvericilərin yayıldığı ərazilərdə Aqrar Xidmətlər Agentliyinin mütəxəssisləri tərəfindən kimyəvi mübarizə tədbirləri intensiv şəkildə davam etdirilir.

Qurumdan bildirilib ki, proses tam nəzarət altındadır və çəyirtkələrin yayılmasının qarşısının alınması istiqamətində zəruri tədbirlər görülür.

4-07-2026, 13:25 125