İyulun 6-da Azərbaycanda hava şəraiti əsasən sabit keçsə də, bəzi rayonlarda yağış, şimşək və dolu ehtimalı var.

Sumqayit.tv xəbər verir ki, Milli Hidrometeorologiya Xidmətinin məlumatına əsasən, Bakıda və Abşeron yarımadasında hava dəyişkən buludlu olacaq, gün ərzində əsasən yağmursuz keçəcək. Şimal-qərb küləyi mülayim əsəcək.

Paytaxt və Abşeron ərazisində havanın temperaturu gecə 20-23 dərəcə, gündüz isə 29-34 dərəcə isti olacaq. Nisbi rütubətin gecə 70-75 faiz, gündüz 55-65 faiz təşkil edəcəyi bildirilir.

Ölkənin rayonlarında isə hava şəraiti fərqli olacaq. Bəzi ərazilərdə arabir yağış yağacağı, ayrı-ayrı yerlərdə leysan xarakterli olacağı, şimşək çaxacağı və dolu düşəcəyi proqnozlaşdırılır. Dağlıq ərazilərdə gecə və səhər saatlarında duman müşahidə oluna bilər.

Rayonlarda havanın temperaturunun gecə 20-24 dərəcə, gündüz 30-35 dərəcə, dağlıq ərazilərdə isə gecə 11-16 dərəcə, gündüz 18-23 dərəcə, bəzi yerlərdə 25-28 dərəcə olacağı gözlənilir. Mülayim şərq küləyi əsəcək.