Ermənistan hakimiyyəti pərdəarxasında Azərbaycanın Zəngəzurla bağlı iddialarından əl çəkməsi müqabilində rəsmi Bakının Qarabağ üzərində suverenliyinin tanınması imkanlarını müzakirə edir.
Sumqayit.tv xəbər verir ki, bu iddia ilə erməni politoloq Arman Qriqoryan çıxış edib.
O, “Rusiya variantı”nın da masada olduğunu, buna əsasən Qarabağın taleyi haqda qərarın gələcək illərə təxirə salınacağını diqqətə çatdırıb.
Politoloq xatırladıb ki, ötən il Azərbaycanın hərbi xərcləri 40% artıb və iki ölkə arasında balans daha da pozulub.
“Hər halda çox şey Rusiyanın mövqeyindən asılıdır. Lakin Moskva Qarabağın müstəqilliyini tanıya bilməz, çünki bu, Türkiyə ilə toqquşmaya gətirib çıxaracaq”, – Qriqoryan qeyd edib.
Xatırladaq ki, Azərbaycan Qarabağ münaqişəsinin həll edildiyini daha əvvəl dəfələrlə bəyan edib. Rəsmi Bakı həmçinin Ermənistanın Zəngəzur dəhlizi ilə bağlı öhdəliklərini yerinə yetirməli olduğunu vurğulayıb.