Bütün dünyanın yaxından izlədiyi İran-İsrail müharibəsi qarşılıqlı raket hücumları ilə davam edir. İsrail iyunun 13-də İrana hücuma keçib. Bu hücumdan sonra İran cavab olaraq İsraili ballistik və hipersəs raketləri ilə vurmağa başlayıb.

Havada olan raketlərin bir hissəsini məhv edən İsrailin hava hücumundan müdafiə sistemi də İrandan gələn onlarla raketin qarşısını ala bilməyib.

Sumqayit.tv xəbər verir ki, İsrail mediası müdafiə sisteminin bir gecəlik xərcini açıqlayıb.

Hücumlara qarşı hava hücumundan müdafiə əməliyyatlarının dəyərinin təxminən 287 milyon dollar olduğu bildirilib.

Məlumata görə, İran raketlərinin əksəriyyəti Arrow2 və Arrow3 sistemləri ilə dayandırılır, Şərqi Aralıq dənizində ABŞ esmineslərindən atılan THAAD sistemi və SM-3 raketləri də aktivləşdirilib, David's Sling sisteminin də inventarda olduğu, lakin hazırda əsas narahatlıq mənbəyinin Arrow sistemləri olduğu qeyd edilib.

Sözügedən xəbərdə Arrow3-ün təxminən yüzdə 90 müvəffəqiyyət nisbətinə, THAAD sisteminin isə yüzdə 40 müdaxilə nisbətinə sahib olduğu təxmin edilir.

İsrailin iqtisadi qəzeti "Globes" ölkənin hava hücumundan müdafiə sistemlərinin dəyərinin dövlət büdcəsinə ciddi yük yaratdığını yazıb. Müvafiq olaraq, bir hədəfin zərərsizləşdirilməsinin dəyəri Dəmir Qübbə üçün 30.000 dollar, David's Sling üçün 700.000 dollar, Arrow2 üçün 1,5 milyon dollar və Arrow3 üçün 2 milyon dollardır.

İsrail mediası bildirib ki, İranın bir gecədə ballistik raketlər atması Tel-Əvivə təxminən 287 milyon dollara başa gəlib.

Qeyd edək ki, İsrailin hava hücumundan müdafiə sistemi təhdid dairəsindən asılı olaraq dörd fərqli təbəqədən ibarətdir. Dəmir Qübbə (4-70 km) sistemləri qısa mənzilli təhlükələrə qarşı, David's Sling (40-300 km) orta mənzilli təhlükələrə qarşı, Arrow2 (təxminən 500 km) uzunmənzilli təhlükələrə qarşı və Arrow3 (təxminən 2400 km) qitələrarası hücumlar üçün işə düşür. //Musavat.com