Türkiyədə yaşayan azərbaycanlı sənətçi Roza İbadova Kocamaz və jurnalist Nigar Ögeday, 18 oktyabr – Azərbaycanın Müstəqilliyinin Bərpası Günü münasibətilə İzmir Karabağlar Şəhidliyini ziyarət ediblər.

Sənətçi və jurnalist Azərbaycanın müstəqilliyi uğrunda canını fəda etmiş bütün şəhidlərin xatirəsini ehtiramla yad edib, onların ruhuna dua oxuyublar. Bu mənalı gündə Türkiyə və Azərbaycan arasında qardaşlıq bağlarının, ortaq acı və ortaq zəfərlərin önəmi bir daha vurğulanıb.

Roza İbadova Kocamaz bildirib:

> “Azərbaycanın müstəqilliyinin bərpası təkcə bir millətin deyil, bütün Türk dünyasının qürurudur. Bu torpaqlarda yaşayan hər bir türk insanının qəlbində eyni sevda, eyni vətən sevgisi var. Müstəqillik şəhidlərdən başlanır. Şəhidini unudan toplumlar gec-tez müstəqilliyini də itirər.”

Jurnalist Nigar Ögeday isə deyib:

> “Bu gün biz burada həm Azərbaycanın müstəqilliyini qeyd etmək, həm də vətən uğrunda canlarını fəda edən qəhrəmanlarımızı anmaq üçün toplaşmışıq. Ruhları şad, məkanları cənnət olsun. Əhəmiyyətli günləri anmaq üçün mütləq Azərbaycanda yaşamaq vacib deyil. Harada olsaq da, bu günlər bizim üçün unudulmaz və dərin mənaya malikdir.”