Gürcüstan ərazisində qəzaya uğrayan Türkiyənin Hərbi Hava Qüvvələrinə məxsus C-130 hərbi nəqliyyat təyyarəsinin ekipaş üzvlərindən olan baş çavuş İlker Aykut Gəncədə təyyarəyə minməmişdən əvvəl atasına zəng edibmiş.  

Sumqayit.tv “Yeni Sabah”a istinadən xəbər verir ki, bunu onun atası Ünal Aykut bildirib.

“Azərbaycanda təyyarəyə minməzdən əvvəl zəng etmişdi. Dedi ki, ata, biz geri qayıdırıq. Həm də soruşdu ki, tarlaları əkmisən? Cavab verdim ki, bəli, əkmişəm”, - şəhidin atası söyləyib.

Xatırladaq ki, hadisə ilə bağlı xəbəri Tekirdağın Muratlı rayonunun Kırkkepenek məhəlləsində yaşayan İlker Aykutun ailəsinə rayon valisi Aytəkin Yılmaz tərəfindən çatdırılıb. Oğullarının şəhid olduğunu eşidən Ünal və Zülbiyyə Aykut göz yaşlarına boğulub. Anası Zülbiyyə Aykut vəziyyətinin pisləşməsi səbəbindən təcili yardım maşını ilə Muratlı Dövlət Xəstəxanasına aparılıb.

Ünal Aykut, dərin kədər içində əsgərlərə sarılaraq “Onsuz da siz də mənim oğlumsunuz” deyib.

Hərbi təyyarələrin texniki baxımını həyata keçirən baş çavuş Berkay Karacanın  şəhid olduğu xəbəri isə Kırklarelinin Lüleburgaz rayonunun 8 Noyabr məhəlləsi, Tuna küçəsində yaşayan ailəsinə Qarnizon Komandanı general-mayor Ali Aydın Torun, rayon rəhbəri Kemal Yıldız və bələdiyyə sədri Murat Gerenli tərəfindən verilib. Ağır xəbəri alan ana Nurdan və ata Nedim Karaca böyük kədər yaşayıb. Şəhidin evinə Türkiyə bayrağı asılıb, evin qarşısına başsağlığı çadırı qurulub.

Qeyd edək ki, Türkiyə Hərbi Hava Qüvvələrinə məxsus C-130 hərbi nəqliyyat təyyarəsi noyabrın 11-də Azərbaycandan qayıdarkən Gürcüstan ərazisində qəzaya uğrayıb. Nəticədə göyərtədə olan 20 hərbçi həlak olub.