Milli Məclisin plenar iclasında müzakirə olunan Nazirlər Kabinetinin 2025-ci il üzrə fəaliyyəti haqqında hesabatda Sumqayıt şəhərində qəzalı vəziyyətdə olan yaşayış binaları ilə bağlı görüləcək işlər barədə məlumat yer alıb.

Hesabatda bildirilib ki, Bakı, Gəncə və Sumqayıt şəhərlərində qəzalı binalarda yaşayan sakinlərin təhlükəsizliyinin təmin olunması və mənzil şəraitinin yaxşılaşdırılması məqsədilə Dövlət Şəhərsalma və Arxitektura Komitəsinə hər il dövlət büdcəsindən vəsait ayrılır.

Məlumata görə, yerli icra hakimiyyətlərinin müraciətləri və Nazirlər Kabinetinin tapşırıqları əsasında Fövqəladə Hallar Nazirliyinin mütəxəssisləri tərəfindən qəzalı binaların siyahısı hazırlanıb. Araşdırmalar nəticəsində

1. Bakı şəhərində 228 ünvanda 7 170 mənzil,

2. Sumqayıt şəhərində 21 ünvanda 464 mənzil,

3. Gəncə şəhərində 11 ünvanda 708 mənzil olmaqla,

ümumilikdə 260 ünvanda 8 342 mənzilin qəzalı vəziyyətdə olduğu müəyyən edilib.

Qeyd olunub ki, həmin binalardan 159-nun dövlət vəsaiti, 84-nün investor vəsaiti, 17-sinin isə dövlət və özəl investorların birgə maliyyəsi hesabına yenilənməsi və sakinlərin köçürülməsi planlaşdırılır.

Hazırkı məlumata əsasən, Bakı, Sumqayıt və Gəncə şəhərlərində qəzalı binalarda yaşayan ailələrdən 1 148-i artıq köçürülüb, onlardan 655-i dövlət vəsaiti, 493-ü isə investorlar hesabına yeni mənzillərlə təmin olunub.

14-03-2026, 16:59 120