Sumqayıt şəhərində Aprel döyüşləri şəhidlərinin xatirəsinə həsr olunmuş anım tədbiri keçirilib. Tədbirdə Sumqayıt Şəhər İcra Hakimiyyətinin başçısı Zakir Fərəcov, şəhid ailələrinin üzvləri və ictimaiyyət nümayəndələri iştirak ediblər.

Sumqayit.tv xəbər verir ki, anım mərasimi çərçivəsində iştirakçılar Sumqayıt Şəhidlər xiyabanını ziyarət edib, Qalib əsgər abidəsinin önünə gül dəstələri düzüblər. Daha sonra şəhidlərin məzarları ziyarət olunaraq üzərlərinə tər çiçəklər qoyulub və xatirələri ehtiramla yad edilib.

Tədbirdə çıxış edən Zakir Fərəcov Aprel döyüşlərinin Azərbaycan tarixində mühüm yer tutduğunu qeyd edib. Bildirilib ki, 2016-cı ilin aprelində həyata keçirilən uğurlu əks-həmlə nəticəsində strateji yüksəkliklər azad olunub və Azərbaycan Ordusunun gücü nümayiş etdirilib.

Çıxışlarda Aprel döyüşlərinin sonrakı dövrdə əldə edilən Zəfərin əsasını təşkil etdiyi vurğulanıb. Qeyd olunub ki, 44 günlük Vətən müharibəsində Prezident, Müzəffər Ali Baş Komandan İlham Əliyevin rəhbərliyi ilə ərazi bütövlüyümüz bərpa olunub.

Sonda şəhid ailələri ilə görüş keçirilib, onların qayğıları ilə maraqlanılıb. Şəhid ailələri isə onlara göstərilən dövlət qayğısına görə təşəkkürlərini bildiriblər.

4-04-2026, 14:26 149