Ulu Öndərin 103-cü ildönümü münasibətilə silsilə tədbirlər keçirilib

Müasir Azərbaycan dövlətinin qurucusu, Ümummilli Lider Heydər Əliyevin anadan olmasının 103-cü ildönümü münasibətilə ölkə üzrə keçirilən anım tədbirləri çərçivəsində S.S. Axundov adına 172 nömrəli tam orta məktəbdə də geniş tədbirlər proqramı təşkil olunub.

Məktəbin direktoru Vəfa Bağırovanın rəhbərliyi ilə pedaqoji kollektiv və 2A sinif şagirdləri Fəxri Xiyabanı ziyarət edərək Ulu Öndərin məzarı önünə gül dəstələri düzüblər, əziz xatirəsini ehtiramla yad ediblər.

Ziyarət zamanı məktəblilərə Heydər Əliyevin Azərbaycan təhsilinin inkişafına göstərdiyi diqqət, gənc nəslin vətənpərvər ruhda formalaşdırılması istiqamətində həyata keçirdiyi siyasət barədə məlumat verilib. Bildirilib ki, Ümummilli Liderin müəyyənləşdirdiyi dövlətçilik ideyaları bu gün də Azərbaycanın inkişaf yolunda mühüm rol oynayır.

Anım tədbirləri daha sonra məktəbin akt zalında “Heydər Əliyev – müstəqil Azərbaycanın memarıdır” adlı bədii-kompozisiya ilə davam edib.

Tədbiri giriş sözü ilə açan məktəbin direktoru Vəfa Bağırova Heydər Əliyevin Azərbaycan xalqı və dövlətçiliyi qarşısındakı xidmətlərindən danışaraq qeyd edib ki, Ulu Öndər təhsili hər zaman dövlətin və millətin gələcəyi hesab edib.

Direktor çıxışında Prezident İlham Əliyevin rəhbərliyi ilə Azərbaycanın əldə etdiyi uğurların təməlində məhz Heydər Əliyevin siyasi kursunun dayandığını vurğulayıb.
Tədbirin bədii hissəsində 2A sinif şagirdlərinin təqdim etdiyi proqram iştirakçılar tərəfindən böyük maraqla qarşılanıb. Şagirdlərin hazırlığında sinif rəhbəri Nəzrin Fəttahovanın xüsusi əməyi qeyd olunub.

Kompozisiyada şagirdlərin ifasında səslənən şeirlər, musiqi nömrələri və Heydər Əliyevin həyat və fəaliyyətinə həsr olunmuş videoçarxlar tədbir iştirakçılarına duyğulu anlar yaşadıb.

Məktəb rəhbərliyi bildirib ki, bu cür tədbirlərin keçirilməsində əsas məqsəd gənc nəslə milli-mənəvi dəyərləri aşılamaq, Heydər Əliyev irsini tanıtmaq və şagirdləri dövlətçilik ənənələrinə sadiq vətəndaşlar kimi formalaşdırmaqdır.
Sonda tədbirin təşkilində əməyi olan müəllim və şagirdlərə təşəkkür edilib.

Könül Zeynallı