Sumqayıt Dövlət Rəsm Qalereyasında "Bir şəhidin həyat səhifəsi” adlı xatirə gecəsi keçirilib.

Sumqayit.tv xəbər verir ki, bu haqda Sumqayıt Regional Mədəniyyət İdarəsi məlumat yayıb.

Tədbir Vətən Müharibəsi şəhidi Xüsusi Təyinatlı Qüvvələrin kəşfiyatçısı Nadir İlqar oğlu Rzayevin anadan olmasının 27- ci ildönümünə həsr olunub. Xatirə gecəsində, şəhidin həyat və döyüş yollarını əks etdirən, videoçarx nümayiş olunub.
Tədbir çərçivəsində qonaqlar şəhərimizin rəssamlarının və məktəblilərinin "Zəfər Günü”nə həsr etdikləri 40-a yaxın əsərləri ilə tanış olublar. Gecədə ailə üzvləri və döyüş yoldaşları, Sumqayıt şəhər İcra Hakimiyyətinin şöbə müdiri Tərlan Hacızadə, yazıçı ssenarist Hafiz Alaxanlı, şəhidin ilk müəllimi, iştirak ediblər.
Məhəmməd Nadir Rzayev 18 noyabr 1994-cü ildə Sumqayıt şəhərində anadan olub. O, Sumqayıt şəhər 17 saylı tam orta məktəbdə təhsil alıb. Nadir Rzayev 2012-ci ildə Azərbaycan Silahlı Qüvvələrinin sıralarında hərbi xidmətdə olub. O, 2014-cü ildən artıq Xüsusi Təyinatlı Qüvvələrin tərkibində müddətdən artıq həqiqi hərbi xidmət qulluqçusu kimi fəaliyyətini davam etdirib.
Rzayev 15 oktyabr 2020-ci ildə Füzuli rayonu istiqamətində döyüş tapşırığının yerinə yetirilməsi zamanı şəhidlik zirvəsinə ucalıb. Məhəmməd Nadir Rzayev ölümündən sonra "Vətən uğrunda” və "Füzulinin azad olunmasına görə” medalları ilə təltif edilib.