Bugünlərdə əməkdar artist Bəhram Bağırzadənin yumoristik videosu yayılıb. Belə ki, B.Bağırzadə DİN tərəfindən mütəmadi yayımlanan vətəndaşların üzr videoları ilə bağlı paylaşıma münasibət bildirib.

DİN-in Mətbuat Xidmətinin KİV və ictimaiyyətlə əlaqələr şöbəsinin rəisi, polis mayoru Elşad Hacıyev Sumqayit.tv-yə  bildirib ki, B.Bağırzadənin hansısa mövzuya onun yanaşması sənətlə əlaqəlidir :
“Əməkdar artist Bəhram Bağırzadə teatral sənət adamıdır, sənətkardır. Mövzunun mahiyyətində olan sarkazm üzrxahlıq edən adamın vəziyyətini əks etdirir. Anlaşılandır, neqativ hallara meylli şəxslərin profilaktikasında çəkindirici xarakter daşıyır”, - şöbə rəisi vurğulayıb.
Qeyd edək ki, əməkdar artist B.Bağırzadə DİN tərəfindən mütəmadi olaraq yayımlanan vətəndaşların üzr videoları ilə bağlı ironik paylaşım etmişdi. O, videoda dostları ilə yeyib-içməyə gedəcəyini, hər ehtimala qarşı Bakıya gələn turistlərdən, şəhərin bütün pişiklərindən üzr istədiyini söyləyərək məsələyə yumoristik şəkildə münasibət bildirib.