Sumqayıt şəhəri, H.Z.Tağıyev qəsəbəsində yerləşən qaraj kompleksində yanğın hadisəsi qeydə alınıb.
Sumqayit.tv xəbər verir ki, bu barədə Fövqəladə Hallar Nazirliyinin “112” qaynar telefon xəttinə məlumat daxil olub.

Hadisə yerinə dərhal FHN-in Dövlət Yanğından Mühafizə Xidmətinin Sumqayıt şəhər Yanğından Mühafizə İdarəsinin əməkdaşları cəlb edilib. Yanğınsöndürənlərin operativ müdaxiləsi nəticəsində bir dam altında yerləşən 15 boksdan ibarət qarajın dam örtüyündə baş vermiş yanğının genişlənməsinin qarşısı alınıb və qısa zamanda söndürülüb.

Ümumi sahəsi 1500 kv.m olan tikilinin dam örtüyündəki taxta konstruksiyalar 200 kv.m ərazidə yanıb. Lakin yanğınsöndürmə tədbirləri nəticəsində tikilinin əksər hissəsi alovdan qorunub.