Sumqayıt şəhərində qonşular arasında insident baş verib.

Sumqayit.tv xəbər verir ki, news24.az-ın əldə etdiyi məlumata görə, hadisə avtomobilin park edilməsi üstündə yaranıb.

Sumqayıtda yaşayan iş adamı 1965-ci il təvəllüdlü Yadulla Cəfərovun (şərti soyad) “Range Rover” markalı avtomobilini qonşusu Arzu Nağıyevanın evinin qarşısında saxlaması narazılığa səbəb olub.

Qadın bildirib ki, Yadulla Cəfərov əvvəllər də dəfələrlə avtomobilini onun qapısının önündə saxlayıb və bu səbəbdən həyətə daxil olmaqda çətinlik çəkib. Hadisə günü Arzu Nağıyeva küçədə avtomobili ilə siqnal verərək Yadulladan maşınını götürməsini xahiş edib.

Bu zaman tərəflər arasında mübahisə yaranıb. Qonşuların müdaxiləsi nəticəsində söz davası fiziki qarşıdurmaya çevrilib. Yadulla Cəfərov evdən şiş götürərək onlara hücum edib və bir nəfərə əl nahiyəsindən yüngül xəsarət yetirib.

Hadisə yerinə polis əməkdaşları cəlb olunub. Yadulla Cəfərov saxlanılıb və barəsində İnzibati Xətalar Məcəlləsinə əsasən protokol tərtib edilib. Sumqayıt Şəhər Məhkəməsinin qərarı ilə o, 100 manat məbləğində cərimələnib.

Qeyd edək ki, Yadulla Cəfərov Birinci Qarabağ müharibəsi veteranıdır.