Ali Məhkəmədə yol qəzası törədərək hadisə yerindən qaçmaqda təqsirləndirilən C.Əliyevin barəsindəki qərardan verilən kassasiya şikayəti üzrə məhkəmə iclası başa çatıb.
 

Sumqayit.tv xəbər verir ki, Pravda.az-ın əldə etdiyi məlumata görə, hakim Nazim Mövsümovun sədrliyi ilə keçirilən prosesdə qərar elan olunub.
 

Qərara əsasən, kassasiya şikayəti təmin edilməyib.

İttihama görə, C.Əliyev 25 oktyabr 2022-ci il tarixdə, saat 06:30 radələrində alkoqol sərxoşluğu vəziyyətində sürücülük vəsiqəsi ilə idarə etdiyi, texniki cəhətdən saz olan özünə məxsus “Bogdan 211040-87” markalı avtomobillə Sumqayıt şəhəri Sülh küçəsində Sumqayıt Bulvarı istiqamətində hərəkətdə olub.

Belə ki, o, yaşayış məntəqəsində icazə verilən 60 km/saat sürət həddini aşaraq avtomobili 76 km/saat sürətlə idarə edib, hərəkət üçün təhlükə yarandığını gördüyü halda nəqliyyat vasitəsinin sürətini azaltmaq və hadisənin qarşısını almaq üçün texniki imkanı olduğu halda heç bir tədbir görməyib. Nəticədə Sumqayıt şəhəri Sülh və Nərimanov küçələrinin kəsişməsində, piyada keçidi üzərindən yolu keçməyə başlayan piyada - zərərçəkmiş D.D.-ni (adı, soyadı şərtidir) avtomobilin sol qabaq hissəsi ilə vurub.

Hadisə nəticəsində zərərçəkmiş şəxsə başın küt travması, kəllə sümüklərinin açıq çoxqəlpəli sınıqları, baş beyinə qansızma və digər ağır bədən xəsarətləri yetirilib və ehtiyatsızlıqdan onun ölümünə səbəb olunub. Bundan sonra C.Əliyev yol-nəqliyyat hadisəsi barədə müvafiq orqanlara məlumat vermədən və xəsarət alan şəxsə yardım göstərmədən hadisə yerindən qaçıb.

Sumqayıt Ağır Cinayətlər Məhkəməsinin hökmü ilə o, 7 il müddətinə azadlıqdan məhrumetmə cəzasına məhkum edilib. Hökmdən məhkum tərəfindən apellyasiya şikayəti verilib. Sumqayıt Apellyasiya Məhkəməsinin qərarı ilə apellyasiya şikayəti təmin edilməyib. Bundan sonra C.Əliyev Sumqayıt Apellyasiya Məhkəməsinin qeyd olunan qərarının ləğv edilməsi və ona daha yüngül cəza təyin olunması barədə kassasiya şikayəti ilə məhkəməyə müraciət edib.

19-01-2026, 11:29 44