Bakı–Sumqayıt xəttində hərəkət edən qatara ziyan vuran yeniyetmələr polis tərəfindən aşkarlanıb

Sumqayit.tv xəbər verir ki, Daxili İşlər Nazirliyindən verilən məlumata görə, Bakı–Sumqayıt marşrutu üzrə hərəkət edən sürət qatarına daş atılması ilə bağlı daha dörd yeniyetmə müəyyən edilib.

Bildirilib ki, hərəkətdə olan qatara daş atılması və şüşəsinin zədələnməsi barədə polisə məlumat daxil olub. Dəmiryolu Nəqliyyatında Polis İdarəsinin əməkdaşları tərəfindən keçirilən tədbirlər nəticəsində əməli törətməkdə şübhəli bilinən dörd yeniyetmə aşkarlanıb.

Həmin şəxslər valideynləri ilə birlikdə polis orqanına dəvət olunublar. Yeniyetmələrlə profilaktik söhbətlər aparılıb, bu cür hərəkətlərin yarada biləcəyi təhlükə onların diqqətinə çatdırılıb.

Qeyd olunub ki, qatara daş atılması sərnişinlərin və qatar heyətinin həyatına ciddi təhlükə yaradır, eyni zamanda qrafikdə gecikmələrə səbəb olur. Bu isə sərnişinlərin mənzil başına gec çatması ilə nəticələnir.

17-03-2026, 14:56 50