Abşeron rayonunun Saray qəsəbəsində qohumunu xüsusi amansızlıqla qətlə yetirməkdə təqsirləndirilən Vüqar Abuzərova hökm oxunub.
Sumqayit.tv Lent.az-a istinadən xəbər verir ki, Sumqayıt Ağır Cinayətlər Məhkəməsində hakim İlham Cəfərzadənin sədrliyi ilə keçirilən prosesdə təqsirləndirilən şəxs 17 il müddətinə azadlıqdan məhrum edilib.
Hadisənin 2025-ci ilin avqust ayında baş verdiyi bildirilir. Abşeron rayon prokurorluğunun məlumatına görə, avqustun 28-də saat 14 radələrində 1971-ci il təvəllüdlü Adil İmambaxışovun öldürülməsi barədə məlumat daxil olub.
Araşdırmalar zamanı 1972-ci il təvəllüdlü Vüqar Abuzərovun qohumu olan Adil İmambaxışovu bıçaqla qəsdən öldürməsinə əsaslı şübhələr müəyyən edilib.
İttihama görə, hadisə zərərçəkmişin təqsirləndirilən şəxsin evində təmir işləri apardığı zaman baş verib. Tərəflər arasında yaranan mübahisə zamanı zərərçəkmiş şəxs qarşı tərəfin başına şüşə banka ilə zərbə endirib. Bundan sonra V.Abuzərov mətbəx bıçağı ilə ona çoxsaylı – ümumilikdə 14 zərbə vuraraq qətlə yetirib.
Hadisədən sonra o, könüllü şəkildə polisə təslim olub.
Təqsirləndirilən şəxsə Cinayət Məcəlləsinin 120.2.4-cü (xüsusi amansızlıqla qəsdən adam öldürmə) maddəsi ilə yekun ittiham elan olunmuşdu.
2-05-2026, 19:50
331
