Xaçmazda bacılarının qızı ilə sevgi münasibətində olan 17 yaşlı oğlana qarşı işgəncə verməkdə təqsirləndirilən iki qardaşla bağlı məhkəmə qərarı qüvvəyə minib.

Sumqayit.tv Qafqazinfo-a istinadən xəbər verir ki, hadisə ötən ilin sonunda Xaçmaz rayonunda baş verib.

İş materiallarına əsasən, 17 yaşlı oğlan qardaşların bacısının qızı ilə sevgi münasibətində olub. Hadisə günü yeniyetmə onların yaşadığı evin hasarına çıxarkən qızın dayısı onu görüb. Bundan sonra iki qardaş yeniyetməni tutaraq əl-qolunu kəndirlə bağlayıb.

Bildirilir ki, onlar yeniyetməni təxminən bir saat bağlı vəziyyətdə saxlayıb, döyərək müxtəlif bədən xəsarətləri yetiriblər. Həmçinin zərərçəkmiş şəxs bir müddət tualetdə saxlanılıb.

Araşdırma zamanı qardaşların qanunsuz azadlıqdan məhrumetmə cinayəti törətdikləri müəyyən edilib. Polis əməkdaşlarının müdaxiləsindən sonra onlar məsuliyyətə cəlb olunublar.

Xaçmaz Rayon Məhkəməsinin hökmü ilə hər iki təqsirləndirilən şəxsə 3 il müddətinə azadlıqdan məhrumetmə cəzası verilib və onlar məhkəmə zalında həbs ediliblər.

Lakin sonradan işə Sumqayıt Apellyasiya Məhkəməsində baxılıb. Məhkəmə qardaşlardan birinin apellyasiya şikayətini qismən təmin edərək onun cəzasını şərti hesab edib və azadlığa buraxılması barədə qərar verib.

Qərarda təqsirləndirilən şəxsin səmimi peşman olması, səhhətində problemlərin mövcudluğu və himayəsində yaşlı valideynlərinin olması nəzərə alınıb.

Digər təqsirləndirilən şəxsin apellyasiya şikayəti isə təmin edilməyib və onun barəsində çıxarılmış hökm qüvvədə saxlanılıb.

15-07-2026, 18:02 54