Sumqayıt Şəhər Məhkəməsində Mənzil İnşaatı Dövlət Agentliyinin (MİDA) "Güzəştli mənzil" informasiya sisteminə qanunsuz müdaxilə ilə bağlı cinayət işi üzrə hökm elan edilib.
Sumqayit.tv xəbər verir ki, iş materiallarına əsasən, təqsirləndirilən şəxs qohumlarının güzəştli şərtlərlə mənzil əldə etməsinə kömək etmək məqsədilə xüsusi "BOT" proqramı hazırlayaraq MİDA-nın informasiya sisteminə qanunsuz müdaxilə edib.
Bildirilib ki, hazırlanan proqram "Captcha" mühafizə mexanizmini avtomatik keçərək elektron kabinetlər vasitəsilə sistemə çoxsaylı sorğular göndərib. Nəticədə digər istifadəçilərin sistemdən istifadəsi məhdudlaşıb və sistemin normal fəaliyyəti pozulub.
Təqsirləndirilən şəxs məhkəmədə özünü təqsirli bilməyərək proqramı internetdəki məlumatlar və süni intellektdən istifadə etməklə hazırladığını, məqsədinin maddi qazanc deyil, qohumlarına kömək etmək olduğunu deyib. O, proqramın işləməsinə baxmayaraq sistemdə xəta yarandığını və mənzil əldə etməyin mümkün olmadığını bildirib.
Məhkəmə onu Cinayət Məcəlləsinin 273.3.1-ci maddəsi ilə təqsirli bilərək 4 min manat cərimə cəzasına məhkum edib.
Mənbə: Qaynarinfo
29-07-2026, 15:23
72
