Xaçmazda tanışını bıçaqlamaqda təqsirləndirilən şəxsə hökm oxunub.

Sumqayit.tv  Pravda.az-a istinadən xəbər verir ki, Sumqayıt Ağır Cinayətlər Məhkəməsində xuliqanlıq niyyəti ilə qəsdən sağlamlığa ağır zərər vurmaqda təqsirləndirilən Fərhad Məmmədov (soyadı şərtidir) barəsində hökm elan edilib.

Məhkəmənin qərarına əsasən, təqsirləndirilən şəxs 7 il müddətinə azadlıqdan məhrum edilib. O, cəzasını ümumi rejimli cəzaçəkmə müəssisəsində çəkəcək.

İttihama görə, hadisə 2025-ci ildə Xaçmaz şəhərində baş verib. Zərərçəkmiş Mehrab Nəbiyev (soyadı şərtidir) zarafatla Fərhad Məmmədovu "qəzəlxan" deyə çağırıb. Bundan sonra tərəflər arasında mübahisə yaranıb və Fərhad üzərində gəzdirdiyi qatlanan cib bıçağı ilə onun qarın nahiyəsinə zərbə endirib.

Məhkəmə-tibbi ekspertizasının rəyinə əsasən, zərərçəkmişin aldığı xəsarətlər həyat üçün təhlükəli olmaqla sağlamlığa ağır zərər kimi qiymətləndirilib.

Məhkəmə istintaqı zamanı Fərhad Məmmədov özünü qismən təqsirli bilib. O bildirib ki, məqsədi zərərçəkmişi qorxutmaq olub və bıçağın təsadüfən dəydiyini iddia edib.

Lakin məhkəmə toplanmış sübutları nəzərə alaraq onu təqsirli bilib və barəsində 7 il müddətinə azadlıqdan məhrumetmə cəzası təyin edib.

6-08-2026, 14:38 65