Sumqayıt Apellyasiya Məhkəməsində Abşeron rayonunun Saray qəsəbəsində qohumunu öldürməkdə təqsirləndirilən Vüqar Abuzərovun apellyasiya şikayətinə baxılıb.

Sumqayit.tv xəbər verir ki, hakim Ruhiyyə Əsgərovanın sədrliyi ilə keçirilən məhkəmə iclasında qərar elan olunub. Qərara əsasən, təqsirləndirilən şəxsin apellyasiya şikayəti təmin edilməyib.

İttihama görə, hadisə 29 avqust 2025-ci ildə saat 11 radələrində Saray qəsəbəsində baş verib.

Məlumata görə, təxminən yeddi ay ərzində Vüqar Abuzərovun yaşadığı evdə təmir işləri aparan qohumu, 1971-ci il təvəllüdlü Adil İmambaxışov hamam otağında kanalizasiya borusunun çəkilməsi ilə bağlı görüləcək işin yerini göstərib.

Bu zaman tərəflər arasında mübahisə yaranıb. İttihama əsasən, Adil İmambaxışov Vüqar Abuzərovu təhqir edib və daha sonra hamam otağında olan şüşə banka ilə onun başına zərbə endirib.

Bundan sonra Vüqar Abuzərovun Adili öldürmək qərarına gəldiyi bildirilir. O, hamam otağında olan mətbəx bıçağını götürərək Adil İmambaxışova çoxsaylı zərbələr endirib.

Məhkəmə-tibbi ekspertizasının nəticələrinə əsasən, mərhumun bədənində 14 kəsilmiş-deşilmiş və kəsilmiş yara müəyyən edilib. Xəsarətlər nəticəsində yaranan kəskin daxili və xarici qanaxma onun ölümünə səbəb olub.

Vüqar Abuzərova Cinayət Məcəlləsinin 120.2.4-cü maddəsi – xüsusi amansızlıqla və ya ümumi təhlükəli üsulla adam öldürmə maddəsi ilə ittiham verilib.

Sumqayıt Ağır Cinayətlər Məhkəməsinin hökmü ilə Vüqar Abuzərov 17 il müddətinə azadlıqdan məhrum edilib.

Sumqayıt Apellyasiya Məhkəməsi isə müdafiə tərəfinin apellyasiya şikayətini təmin etməyib və əvvəlki qərarı qüvvədə saxlayıb.

Mənbə: Pravda.az

12-08-2026, 17:45 63