Xaçmazda psixi xəstəlikdən əziyyət çəkən qadını öldürməkdə təqsirləndirilən Fərman Dəmirovun barəsindəki məhkəmə qərarından verilən kassasiya şikayətinə baxılıb.

Sumqayit.tv Pravda.az-a istinadən xəbər verir ki, ittihama görə, hadisə 2023-cü il oktyabrın 23-də Xaçmaz şəhərində baş verib. Fərman Dəmirovun qadının evinə qanunsuz daxil olaraq ona ağır xəsarətlər yetirdiyi və nəticədə onun öldüyü bildirilib.

Məhkəmə materiallarında təqsirləndirilən şəxsin qadına məxsus bəzi əşyaları götürdüyü və şəxsiyyət vəsiqəsini gizlətdiyi də qeyd olunub.

Sumqayıt Ağır Cinayətlər Məhkəməsinin hökmü ilə Fərman Dəmirov 19 il müddətinə azadlıqdan məhrum edilib. Sonradan verilən apellyasiya şikayəti də təmin edilməyib.

Məhkum və müdafiəçisi bu dəfə Ali Məhkəməyə kassasiya şikayəti verərək qərarın ləğv edilməsini və ona bəraət verilməsini istəyiblər.

Ali Məhkəmə kassasiya şikayətini təmin etməyib. Beləliklə, Fərman Dəmirova verilən 19 illik həbs cəzası qüvvədə saxlanılıb.

Qeyd edək ki, ittihama əsasən, Dəmirov mərhum qadının evinin yaxınlığında tikintidə fəhlə işləyib.

27-08-2026, 13:15 31