Bu gün (red-dünən) 27 sentyabr 2020-ci ildə başlayan "Vətən" müharibəsi zamanı şəhid olan Azərbaycan Silahlı Güvvələrinin giziri Quliyev Şəhriyar Nəsib oğlunun və Azərbaycan Silahlı Güvvələrinin əsgəri Quluyev Azər Zakir oğlunun Sumqayıtda anım mərasimi keçirilib.
Sumqayit.tv xəbər verir ki, şəhidimiz Şəhriyar Quliyevin anım mərasimi Şəhidlər Xiyabanında məzarını  ziyarət edilərək başlanılıb, sonra isə mərasim evlərinin birində ehsan süfrəsi verilərək davam edib. Məclisdə Corat Məscidinin nümayəndələri, icra nümayəndələri, şəhidimizin iş yoldaşları, qazilər, şəhid valideynləri, yoldaşları və qohumları iştirak ediblər.
Şəhidimiz Quluyev Azər Zakir oğlunun anım mərasimi Şəhidlər Xiyabanında məzarını ziyarət edilərək başlanılıb, anım mərasimi xeyir-şər evlərinin birində ehsan süfrəsi verilərək davam edib. Məclisdə icra nümayəndələri Ceyhun Məmmədov, Tərlan Hacızadə, Corat Məscidinin axundu, Hacı Rauf, şəhid ailələri,  şəhidimizin iş yoldaşları və qohumları iştirak ediblər. 
Xatırladaq ki, Şəhriyar Quliyev 1990-cı il mayın 25-də Ağdam rayonunun Cinli kəndində anadan olub. 1997-2008-ci illərdə Sumqayıt şəhərində M. Füzuli adına 15 nömrəli tam orta məktəbdə təhsil alıb. Ailəli idi. 2 oğlu yadigar qaldı. 2009-cu ildən isə Xüsusi Təyinatlı Qüvvələrin sıralarında müddətdən artıq həqiqi hərbi xidmət qulluqçusu olub. 2016-cı ilin 2-6 aprelində baş verən Aprel döyüşlərində savaşıb.
Ordumuzun giziri olan Şəhriyar Quliyev 2020-ci il sentyabrın 27-də Azərbaycan Silahlı Qüvvələri tərəfindən, Ermənistan işğalı altında olan ərazilərin azad edilməsi və ərazi bütövlüyümüzün bərpa olunması üçün başlanan Vətən müharibəsinin zamanı Cəbrayılın, Hadrut qəsəbəsinin, Füzulinin və Qubadlının azadlığı uğrunda gedən döyüşlərdə savaşıb.150-ə yaxın erməni əsgər və zabitini məhv edib. Məhv edilənlər arasında polkovnik də olub. Şəhriyar Quliyev oktyabrın 23-də Qubadlı döyüşləri zamanı şəhid olub. Sumqayıt şəhərinin Şəhidlər Xiyabanında dəfn olunub. Azərbaycan Prezidenti İlham Əliyevin 09.12.2020-ci il tarixli Sərəncamına əsasən Şəhriyar Quliyev "Qarabağ" ordeni ilə təltif edildi. Həmçinin şəhidimiz "Vətən uğrunda", "Cəbrayılın azad olunmasına görə", "Füzulinin azad olunmasına görə" "Xocavəndin azad olunmasına görə" medalları ilə təltif olunmuşdur. 

Allah ruhunuzu şad etsin, Qəhrəmanlar! 

Müxbir:Vəsiqə DADAŞOVA