Türkiyənin dünən Egey və Aralıq dənizi sahillərində ard-arda 4 pilotsuz uçan aparat (PUA) uçduğu görülüb. Uçuşlar radarlara düşüb.
Sumqayit.tv Teleqraf.com-a istinadən xəbər verir ki, türk PUA-ları Suriyada da intensiv uçuşlar həyata keçirib.
İdlib, Hələb və Latakiya bölgələrində eyni vaxtda 3-4 dronun bir-birinə yaxın məsafədə uçduğu təsbiq edilib.
Afina ilə gərginlik dövründə və Yunanıstan Sahil Mühafizəsinin qaçqınlara qarşı kobud davranışının çox danışıldığı günlərdə baş verən bu fəallıq diqqət çəkib.

Türkiyəli hərbi ekspert Turan Oğuz son gəlişmələri “Haber 7” üçün şərh edib. Türkiyənin 300-ə yaxın PUA donanmasına sahib olduğunu bildirən Oğuz adi günlərdə hər gün orta hesabla 15-20 dronun eyni vaxtda havaya qaldırıldığını, amma dünən baş verənlərdə bir fərq olduğunu deyib. Ekspert bu PUA-ların adətən modullarını söndürdüyü üçün radarda görünmədiyini, amma dünən bilərəkdən görünmək istənilmiş ola biləcəyini qeyd edib.

“Adətən modullar Suriyada vurulmasın deyə açılırdı, Yunanıstan yaxınlığında isə bağlı saxlanılırdı. Ola bilsin ki, mesaj vermək üçün açıblar, Yunanıstandan görünməsini istəyiblər”.
Oğuz Türkiyənin Suriyanın İdlib bölgəsində davamlı olaraq PUA-dan istifadə etdiyini bildirib:

“Türk PUA-ları İraqda da xidmət edirlər, amma orada bağlayırlar. “Pəncə-Kilid” əməliyyatlarında vurduğu yerləri davamlı olaraq görürük, amma bu PUA-lar radarda görünmür. Türkiyə o bölgədə görünməməyə üstünlük verir”.