Misli Premyer Liqasının 8-ci turu yüksək məhsuldarlıqla yadda qalıb. Keçirilən 6 qarşılaşmada ümumilikdə 24 qol vurulub.

Sumqayit.tv xəbər verir ki, “Şamaxı” – “Kəpəz” (1:4) və “Sumqayıt” – “Karvan-Yevlax” (4:1) oyunlarında 5 qol qeydə alınıb. “Neftçi” – “Araz-Naxçıvan” və “İmişli” – “Qəbələ” (hər ikisi 2:2) matçlarında 4, “Turan Tovuz” – “Qarabağ” (1:2) və “Sabah” – “Zirə” (3:0) qarşılaşmalarında isə 3 qol vurulub.

Bu, cari mövsümün yeni məhsuldarlıq rekordu sayılır. Əvvəlki ən yüksək göstərici 18 qol idi (orta hesabla 3,00) və bu, V tura təsadüf etmişdi.

Orta məhsuldarlığın ən azı 4 olması son 4 mövsümdə ilk dəfə baş verir. Sonuncu belə hal 2021/22 mövsümünün X turunda yaşanmışdı — həmin vaxt 4 oyunda 17 qol (orta 4,25) vurulmuşdu.

O dövrdə “Sabah” – “Zirə” (3:3), “Şamaxı” – “Neftçi” (3:2), “Səbail” – “Qəbələ” (0:2) və “Sumqayıt” – “Qarabağ” (0:4) görüşləri oynanılmışdı.

Bu dəfə isə Sumqayıt təmsilçisi “Karvan-Yevlax” üzərində 4:1 hesablı inamlı qələbə ilə həm məhsuldarlıq rekorduna, həm də azarkeşlərin sevincinə səbəb olub. Şəhərin futbol ictimaiyyəti bu nəticəni komandanın mövsümün ən parlaq çıxışlarından biri kimi dəyərləndirir.