Cüdo üzrə 17 yaşadək yeniyetmələr arasında Azərbaycan birinciliyində Sumqayıt idmançıları uğurla çıxış ediblər.
Sumqayit.tv xəbər verir ki, Abşeron Olimpiya İdman Kompleksində start götürən ölkə birinciliyinin ilk günündə Sumqayıtı təmsil edən bir neçə cüdoçu mükafatçılar sırasında yer alıb.
Yarışın ilk günündə qızlar və oğlanlar arasında müxtəlif çəki dərəcələrində mübarizə aparılıb. Qızların yarışında Ləman Niftəliyeva (Sumqayıt şəhəri 2 nömrəli UGİŞM) 40 kq çəki dərəcəsində, Sümeyya Nuriyeva (Sumqayıt şəhəri İOEUGİM) isə 70 kq çəki dərəcəsində bürünc medal qazanıb. Eyni zamanda Neftçi Sumqayıt klubunun üzvləri Yağmur Əhmədzadə və Məleykə Mürsəliyeva 52 kq çəki dərəcəsində üçüncü yerə layiq görülüblər.
Oğlanların yarışında isə Sumqayıt təmsilçiləri xüsusilə fərqləniblər. Nihad Ağayev (Sumqayıt şəhəri 1 nömrəli İOEUGİŞM) 50 kq çəki dərəcəsində bütün rəqiblərini məğlub edərək qızıl medal qazanıb. Həmin çəki dərəcəsində Rəvan Məmmədli (Sumqayıt şəhəri 2 nömrəli UGİŞM) isə üçüncü yerin sahibi olub.
Qeyd edək ki, dörd gün davam edəcək Azərbaycan birinciliyinə ölkə üzrə 89 klub və idman cəmiyyətindən ümumilikdə 495 cüdoçu qatılıb. Sumqayıtlı idmançıların turnirin növbəti günlərində də mübarizəni davam etdirməsi gözlənilir.
19-12-2025, 13:20
204
