İqtisadiyyat Nazirliyi yanında İqtisadi Zonaların İnkişafı Agentliyi Rusiya Ticarət və Sənaye Palatasının Azərbaycandakı Fəxri Nümayəndəliyinin və Rusiya-Azərbaycan Dialoq Assosiasiyasının dəstəyi ilə keçirilən biznes forum çərçivəsində panel iclasda təmsil olunub.

"Report" bu barədə agentliyə istinadən xəbər verir. 

Məlumata görə, qurumun sədr müavini Aqil Əzizov sənaye zonaları, burada sahibkarlar üçün mövcud investisiya imkanları barədə məlumat verib, tədbir iştirakçılarının suallarını cavablandırıb. Tədbirin davamı olaraq forum iştirakçılarının Sumqayıt Kimya Sənaye Parkına tanışlıq səfəri təşkil edilib.

Bununla əlaqədar keçirilən tədbirdə əvvəlcə qonaqlara Parkın fəaliyyəti barədə məlumat verilib, həm buranın, həm də Ağdam Sənaye Parkının rezidentlərinin nümayəndələri təmsil etdikləri müəssisələrin fəaliyyətləri barədə təqdimatla çıxış ediblər.

50-dən çox iş adamının iştirak etdiyi səfərdə qonaqlar Sumqayıt Kimya Sənaye Parkında görülmüş işlərlə, Parkının rezidentlərinin polad boru, IVECO markalı yüngül, orta və ağır tonnajlı yük avtomobilləri, tikinti kimyəviləri və vərəqə şüşə istehsalı müəssisələrinin fəaliyyətləri ilə tanış olublar.