Sumqayıtda oktyabr ayı üzrə bütün sosial ödənişlər tam şəkildə həyata keçirilib

Sumqayit.tv xəbər verir ki, Əmək və Əhalinin Sosial Müdafiəsi Nazirliyinin tabeliyində olan Dövlət Sosial Müdafiə Fondu tərəfindən oktyabr ayına aid bütün sosial ödənişlər yekunlaşdırılıb.

Nazirlikdən verilən rəsmi məlumata görə, oktyabrın 10-da Bakı, Sumqayıt şəhərləri, Abşeron rayonu və Naxçıvan Muxtar Respublikası üzrə pensiyaların ödənişi həyata keçirilib.

Daha sonra oktyabrın 21-də ölkənin digər bölgələrində yaşayan pensiyaçılara, eləcə də güzəştli şərtlərlə pensiya təyin edilmiş şəxslərə ödənişlər aparılıb.

Bu gün isə oktyabr ayına dair müavinət, təqaüd və ünvanlı dövlət sosial yardımlarının verilməsi başa çatdırılıb.

Beləliklə, Sumqayıt sakinləri üçün nəzərdə tutulan bütün sosial ödənişlər tam və vaxtında ödənilib.