Sumqayıt Kimya Sənaye Parkının ərazisində inşa edilən dəniz suyunun duzsuzlaşdırılması zavodunun tam istismara verilməsi 2028-ci ilin IV rübünə planlaşdırılır.
Sumqayit.tv xəbər verir ki, bu barədə məlumat "ACWA Power" şirkətinin rüblük hesabatında yer alıb. Layihəyə 1,5 milyard Səudiyyə rialı (təxminən 679,95 milyon manat) həcmində investisiya yatırılıb.
Zavodun gündəlik gücü 300 min kubmetr olacaq və layihə “ACWA Power” ilə Türkiyənin “IC İçtaş İnşaat” şirkətinin daxil olduğu konsorsium tərəfindən həyata keçirilir. Sazişə əsasən, obyekt 27,5 il ərzində idarə olunacaq, daha sonra Azərbaycan Dövlət Su Ehtiyatları Agentliyinə təhvil veriləcək.
Tikinti işlərinin 2,5 il ərzində başa çatdırılması nəzərdə tutulur. Zavodun fəaliyyətə başlaması Sumqayıt və Abşeron regionlarında içməli su təminatının yaxşılaşmasına, həmçinin sənaye parkında yerləşən müəssisələrin fasiləsiz su təchizatına mühüm töhfə verəcək.
Qeyd edək ki, “ACWA Power” eyni zamanda “Xızı-Abşeron” Külək Elektrik Stansiyasının tikintisini də həyata keçirir. Bu layihələrin reallaşması Azərbaycanın yaşıl enerji və su təhlükəsizliyi strategiyasına uyğun olaraq, Sumqayıt və ətraf regionların iqtisadi inkişafına ciddi təkan verəcək.
4-11-2025, 18:30
229
