Lənkəran İşıqlandırma Müəssisəsi "İS.M.M” şirkəti ilə satınalma müqaviləsi bağlayıb.
Qaynarinfo-nun məlumatına görə, müqavilədə elektrik mallarının satın alınması nəzərdə tutulur. Buna görə şirkətə 273 477,8 manat ödəniləcək.
"İS.M.M” MMC satınalma müsabiqələrində fəal iştirak edən şübhəli şirkətlər siyahısındadır. Şirkət 30 aprel 2004-cü ildə qeydiyyata alınıb. Nizamnamə kapitalı 2 897 170 manatdır. Hüquqi ünvanı Bakı şəhəri Yasamal rayonu, Əlövsət Quliyev küçəsi, ev 98, mənzil 15-də yerləşən şirkətin qanuni təmsilçisi Xudiyev Nadir Bilman oğludur.
"İS.M.M” MMC və Nadir Xudiyev haqqında açıq mənbələrdə heç bir məlumata rast gəlinmir. Araşdırmalarımız zamanı məlum olub ki, Nadir Xudiyev eyni zamanda "RASH.M.M Trade and Services-2020” MMC-nin qanuni təmsilçisidir. Bu şirkət 26 noyabr 2013-cü ildə qeydiyyata alınıb. Nizamnamə kapitalı 406 939 manatdır.
Bu şirkət haqqında da açıq mənbələrdə heç bir məlumat yoxdur.
Dövlət satınalmalarının vahid internet portalı üzərindən apardığımız araşdırmadan aydın olur ki, hər iki şirkət satınalma müsabiqələrində fəal iştirak edir. Maraqlıdır ki, "İS.M.M” MMC-nin qalib gəldiyi tenderlər əsasən yolların təmiri ilə əlaqədardır. Şirkət cari ildə bu satınalma predmeti üzrə 7 tenderin qalibi seçilib. Həmin tenderlər Şabran Rayon İcra Hakimiyyəti Başçısının Şabran şəhəri üzrə Nümayəndiliyi, Sumqayıt Şəhər İcra Hakimiyyəti Başçısının Hacı Zeynalabdin Tağıyev Qəsəbəsi üzrə Nümayəndəliyi, Lənkəran Şəhər İcra Hakimiyyəti, Siyəzən Rayon İcra Hakimiyyəti, Sumqayıt Şəhər İcra Hakimiyyəti yanında Mənzil-Kommunal Təsərrüfatı İstehsalat Birliyi və Gədəbəy Rayon İcra Hakimiyyəti tərəfindən keçirilib. Bu tenderlər üzrə satınalma müqavilələrinin ümumi maliyyə dəyəri 2 910 992,90 manatdır.
Beləliklə, aydın olur ki, Lənkəran İşıqlandırma Müəssisəsi yol təmiri ilə məşğul olan şirkətdən elektrik malları alacaq. Yeri gəlmişkən, Lənkəran İşıqlandırma Müəssisəsi Lənkəran Şəhər İcra Hakimiyyətinin tabeliyində fəaliyyət göstərir.
Bir maraqlı faktı da qeyd etmək yerinə düşər. "İS.M.M” MMC-nin hazırda 11 810,73 manat vergi borcu var. Qanunvericiliyə əsasən vergi borcu olan şirkətlərin satınalma müsabiqələrində iştirakı qadağandır. Bu qadağanın "İS.M.M” MMC üçün keçərli olmaması şirkətin güclü himayədarlarının olduğunu və tender əməliyyatları üçün təsis edildiyini düşünməyə əsas verir.
18-11-2025, 13:51
128
