Səhiyyə Nazirliyinin İnnovasiya və Təchizat Mərkəzi təcili tibbi yardım avtomobillərinin alınması üçün “Az-Tex-Import” MMC ilə 7 milyon 626 min 63,88 manat dəyərində müqavilə imzalayıb.
Sumqayit.tv xəbər verir ki, məlumata görə, müqavilə çərçivəsində müasir tibbi avadanlıq kompleksləri ilə təchiz olunmuş təcili yardım və digər təyinatlı avtomobillər alınacaq. Sifariş bir mənbə üzərindən həyata keçirildiyindən, ümumilikdə neçə avtomobilin alınacağı açıqlanmayıb.
Qeyd edək ki, “Az-Tex-Import” MMC Sumqayıt Kimya Sənaye Parkının rezidentidir. Şirkət 2022-ci ildə qeydiyyata alınıb və bu ilin aprelində Sumqayıtda “IVECO” markalı yük və xüsusi təyinatlı avtomobillərin yığımı üçün zavod istifadəyə verilib. Müəssisədə xüsusi təyinatlı texnikaların istehsalı həyata keçirilir.
Şirkət bu günlərdə digər böyük dövlət sifarişlərini də əldə edib. Regional Su Meliorasiya Xidmətinə istehsal təyinatlı qəza-bərpa mexanizmlərinin satışı üçün 17 milyon 982 min 799,98 manatlıq, İri Şəhərlərin Birləşmiş Su Təchizatı Xidmətinə isə müxtəlif xüsusi təyinatlı texnikaların satışı üçün 6 milyon 959 min 659 manatlıq müqavilə imzalanıb.
Nizamnamə kapitalı 226 min 10 manat olan şirkətin hazırkı qanuni təmsilçisi İlkin İbadullayevdir. Açıq mənbələrdə onun fəaliyyəti ilə bağlı məlumatlar məhduddur. Dövlət Vergi Xidmətinin məlumatına əsasən, bu vəzifəni 2022-ci ilin noyabrınadək Samir İbadullayev icra edib.
11-12-2025, 09:00
75
