Azərbaycanda səfərdə olan Türkiyənin müxtəlif ali təhsil müəssisələrini təmsil edən nümayəndə heyəti Sumqayıt Sənaye Parkında olub.
Sumqayit.tv xəbər verir ki, görüş İqtisadiyyat Nazirliyinin tabeliyində fəaliyyət göstərən İqtisadi Zonaların İnkişafı Agentliyinin idarəçiliyində olan Sumqayıt Sənaye Parkında keçirilib.
Məlumata görə, Agentliyin İdarə Heyətinin sədri Seymur Adıgözəlov qonaqlara qurumun fəaliyyəti, ölkədə sənaye zonalarının inkişafı istiqamətində görülən işlər, eləcə də yerli və xarici investorlar üçün yaradılmış əlverişli biznes və investisiya mühiti barədə ətraflı məlumat verib.
Diqqətə çatdırılıb ki, sənaye zonalarında rezidentlər üçün tətbiq olunan vergi və gömrük güzəştləri, hazır infrastruktur, logistika imkanları və dövlət dəstəyi mexanizmləri qeyri-neft sektorunun inkişafına, ixrac potensialının artmasına və yeni iş yerlərinin yaradılmasına mühüm töhfə verir.
Görüş zamanı ali təhsil müəssisələri ilə sənaye müəssisələri arasında əməkdaşlığın genişləndirilməsi, birgə tədqiqat və innovasiya layihələrinin həyata keçirilməsi, kadr hazırlığı və bilik mübadiləsi istiqamətində imkanlar da müzakirə olunub.
Daha sonra nümayəndə heyəti Sumqayıt Sənaye Parkında fəaliyyət göstərən müəssisələrə baxış keçirib, istehsal prosesi ilə yerində tanış olub. Qonaqlara “Kartaş Kimya” MMC və “Azərfloat” QSC-də istehsalın təşkili, keyfiyyətə nəzarət və ixrac imkanları barədə məlumat təqdim edilib.
Nümayəndə heyəti Sumqayıt Sənaye Parkında yaradılmış müasir infrastruktur və əlverişli biznes mühitini yüksək qiymətləndirib.
20-04-2026, 18:22
341
