Sumqayit.tv xəbər verir ki, bugün şəhid Verdiyev İsax Ədalət oğlunun mövlud mərasimi keçirilib. Öncəliklə Verdiyev İsax Ədalət oğlu Şəhidlər Xiyabanında yad edilib. Daha sonra şəhidimizin adına barelyefin açılışı olub. Tədbirdə 3 nömrəli məktəbin, İqtisad Universitetinin kollektivi, Pioner marketin müdiri Pərviz Rzayev və kollektivi, eləcə də şəhidimizin dostları, qohumları və şəhid ailələri iştirak ediblər.

Qeyd edək ki, Verdiyev İsax Ədalət oğlu 1997-ci il sentyabrın 21-də Rusiya Fedarasiyası Kalininqrad şəhərində anadan olub. O evin tək övladı idi. Azərbaycan Ordusunun əsgəri olan İsax Verdiyev 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı könüllü olaraq Füzulinin azadlığı uğrunda gedən döyüşlərdə savaşıb və 05.10.2020-ci ildə Füzuli rayon istiqamətində düşmən üzərinə hücuma keçərkən şəhid olub.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən İsax Verdiyev ölümündən sonra "Vətən uğrunda", 25.12.2020-ci il tarixli Sərəncamına əsasən "Füzulinin azad olunmasına görə" medalı ilə təltif edilib. 

Allah rəhmət eləsin!